سه‌رۆكى حکوومەتی هه‌رێمى كوردستان، پێشوازى له‌ باڵوێزى نوێى ئه‌ڵمانيا له‌ عێراق و شاندێكى ياوه‌رى كرد

مەسرور بارزانى، سه‌رۆكى حکوومەتی هه‌رێمى كوردستان، پێشوازى له‌ كريستيانه‌ هۆمان باڵوێزى نوێى ئه‌ڵمانيا له‌ عێراق و شاندێكى ياوه‌رى كرد.
ئه‌مڕۆ دووشه‌ممه‌ 9/10/2023، مه‌سرور بارزانی، سەرۆکی حکوومەتی هه‌رێمی كوردستان، له‌ دیدارێكدا، پیرۆزبایی لە باڵوێز کرد بەبۆنەی دەستبەکاربوونی و هیوای سەرکەوتنی بۆ خواست. سەرۆکی حکوومەت هەروەها سوپاسی هاوکاریی و پشتیوانیی ئەڵمانیای لە هەرێمی کوردستان کرد.
تەوەرێکی سەرەکی کۆبوونەوەکە، تایبەت بوو بە گرنگیی چارەسەرکردنی کێشەکانی نێوان هەرێمی کوردستان و حکوومەتی فیدراڵ. هەردوولا هاوڕابوون لەسەر پێویستیی ڕێزگرتن لە سیستەمیی فیدراڵی و پاراستنی مافەکانی گەلی کوردستان و گشت پيکهاتەکان لە چوارچێوەی دەستووردا.
باڵوێزی ئەڵمانیا ئامادەیی وڵاتەکەی بۆ پەرەپێدانی پەیوەندییەکان لەگەڵ عێراق و هەرێمی کوردستان دەربڕی، بەتایبەتی لە بوارەکانی وەبەرهێنان و ئاڵوگۆڕی بازرگانیدا.