بەرپرسێکی وەزارەتی کاروباری شەهیدان و ئەنفالکراوانی حكوومەتی هەرێمی كوردستان ئاشكرای دەكات، بڕیاری پێدانی یەكەی نیشتەجێبوون، لە بری زەویی نیشتەجێبوون بۆ كەسوكاری شەهیدان و ئەنفالكراوان و زیندانییانی سیاسی جێبەجێ دەكرێت.
عادل ساڵح، بەڕێوەبەری راگەیاندن و پەیوەندییەكانی وەزارەتی کاروباری شەهیدان و ئەنفالکراوانی حكوومەتی هەرێمی كوردستان، راگەیاند: كەسوكاری شەهید و ئەنفالكراوان و زیندانییانی سیاسی، كە تاوەكوو ئێستا لە پێدانی زەویی نیشتەجێبوون سوودمەند نەبوونە، یەكەی نیشتەجێبوونیان پێ دەدرێت، ئەویش بەپێی بڕیاری تازەی سەرۆكایەتیی ئەنجوومەنی وەزیران و سەرجەم دامودەزگا پەیوەندیدارەكانیش راسپێردراون، كە كار لەسەر ئەو بابەتە بكەن.
بەرپرسەكەی وەزارەتی كاروباری شەهیدان روونكردنەوەی لەبارەی بڕیارەكە دا و گوتی: ئەوانەی تاوەكوو ئێستا سوودمەند نەبوونە، ناوەکانیان دەکرێتە لیستێک و ڕەوانەی ئەنجوومەنی وەزیران دەکرێت و ئەوانیش فەرمانی بۆ لایەنی پەیوەندیدار پێ دەردەکەن، وەکوو وەزارەتی ئاوەدانکردنەوە و شارەوانی و داد و کشتوکاڵ و شەهیدان و دەستەی وەبەرهێنان ڕادەسپێرێن بۆ ئەو بابەتە، بەڵام ئەوەی زەویی وەرگرتووە سوودمەند نابێت، تەنیا ئەو کەسوکاری شەهیدانەی سوودمەند نەبوون، ئەوان سوودمەند دەبن.
ئاماژەی بەوەش دا: "بڕیاری پێدانی یەکەی نیشتەجێبوون بە کەسوکاری شەهیدان و ئەنفالکراوان، هەنگاوێکی زۆر گرنگە و لە کابینەی نۆیەمیش لە کارنامەکەیدا چەسپێندراوە، کە خزمەتی کەسوکاری شەهیدان و ئەنفالکراوان و زیندانییانی سیاسی و بەرکەوتوانی چەکی کیمیایی و ڕزگاربوانی شاڵاوی ئەنفال لەپێشینەی کارەکان دەبێت و خزمەتەکان بەردەوام دەبن، یەکێک لەوانە پێدانی یەکەی نیشتەجێبوونە لەبری زەوی بە کەسوکاری شەهیدان.
عادل ساڵح، جەختی كردەوە: گۆڕینی بڕیاری زەوی بۆ یەكەی نیشتەجێبوون بۆ ئەوە دەگەڕێتەوە، پێشووتر زەوییەكی زۆر دابەش كراوە، بەڵام كێشەی نیشتەجێبوونی چارەسەر نەكردووە."
زیاتر لە 100 هەزار كەسوكاری شەهید و ئەنفالكراو و پێنج هەزار زیندانیی سیاسی هەیە و لە لایەن حكوومەتی هەرێمی كوردستانەوە زەوی بە بەشێكیان دراوە.
وەڵام بدەوه