گۆڕانکاریەکانی کەشوهەوا نابێت نادیدە بگیرێن

گۆڕانکاریەکانی کەشوهەوا نابێت نادیدە بگیرێن
هۆکاری گۆڕانکاریە سرووشتیەکانی کەشوهەوا لەم چەند ساڵەی رابردوودا سەرەنجی زیاد لە وڵاتێکی بەلای خۆیدا ڕاکێشاوەو گەورەبەرپرسانی جیهانی خستۆتە جموجۆڵەوە. 
لێکەوتەکانی گۆڕانی کەشوهەوا لە چەشنی باووزریانی وێرانکەر، وشکەساڵی، لافاو و توانەوەی بەستەڵەکی جەمسەری باکور و  زەرەروزیانە بەرچاوەکانی کشتوکاڵ و دواجار قاتی و قڕی، هەنوکە بەرۆکی زۆربەی هەرە زۆری دانیشتوانی وڵاتە هەژارەکانی گرتووەو خستووینەتە بەردەم هەڕەشەی لەناەعوچوونەوە. 
گومانیشی تێدانیە وڵاتانی پیشەسازی و پێشکەوتوو بەهۆی ژمارەیەکی یەجگار زۆر لە کۆمپانیاکانی کەرتی پیشەسازی و بەرهەمهێنان و دەرەدانی قەوارەیەکی گەورە لە دوائۆکسیدی کاربۆن و گازە ژەهراویەکانەوە، بەهۆکاری سەرەکی گۆڕانکاریەکانی کەشووهەواو درووست بوونی لافاوو باووبۆران و زریان و وشکەساڵیەوە لەقەڵەم دەدرێن. 
گەورەیی قەبارەی گۆڕانکاریەکانی کەشوهەوا لە ئاستێکدان وڵاتە هەژارەکان باجێکی گەورەی زەرەرو زیانەکانی دەدەن و هیچ ئاسۆیەکی روناکیش بۆ سنوور دانانان لەبەردەم ئەم تەوژمە سرووشتیەی وڵاتانی پێشکەوتووی پیشەسازی رۆڵی سەرەکی لە درووست بوونیدا دەگێڕن، دیار نیە.  
بەجۆرێک حاڵی حازر ئەم دیاردەیە زیاتر لە دووسەت ملیۆن کەس لە دانیشتووانی ئەفریقیای خستۆتە بەردەم مەترسی لە ناوچوون و کۆچی بە کۆمەڵ و برسێتی و قات و قڕیەوە. 
بەداخەوە هیچ کام لەو سمینارو لوتکە جیهانیانەی ساڵانە لە ئاستی جیهاندا بۆ پڵان دانانی ڕووبەڕووبوونەوەی  گەرم بوونی پلەی گەرمی گۆی زەوی رێک دەخرێن، نەیانتوانیوە کاریگەری دەرهاوێشتەکانی کارەسات و دیاردە سرووشتیەکان کەم بکاتەوە  .