خۆتان بۆ سەرمایەکی زۆر ئامادەبکەن

زەکەریا کانی پاشایی، شارەزای کەشناسی رایگەیاند، لەئەمڕۆوە شەپۆلی بارانبارین بە تەواوی کۆتایی پێدێت و بۆ ماوەیەکی درێژخایەن (نزیکەی 12 تا 15 ڕۆژ) کەشوهەوای ناوچەکە سەقامگیر دەبێتەوە.
ئاماژەی بەوەشکرد، بەپێی نەریتی سروشتیی وەرزی دابارین، لە دوای هاتنی پەڵەی سەرانسەری لە زۆربەی ناوچەکاندا، ماوەی  12 تا 15  ڕۆژ باران بارین دەوەستێت, لەم ڕوانگەیەوە ڕێنمایی بە جووتیاران دەدرێت کە لە دوو ڕۆژی داهاتووەوە دەست بە کێڵان و جووتکردنی زەوییەکانیان بکەن، چونکە دەرفەتێکی گونجاویان لەپێشە.
لە بارەی پلەکانی گەرماوە، ئەو کەشناسە ڕوونیکردەوە، پێشبینی دەکرێت لە ڕۆژی دووشەممەدا پلەکانی گەرما بە جێگیری بمێننەوە، بەڵام لە شەوی دووشەممە لەسەر سێشەممەوە بارستە هەوایەکی وشک و ساردی جەمسەری ڕوو لە ناوچەکە بکات، کە ئەمە یەکەمین شەپۆلی ساردی جەمسەرییە لەم وەرزەدا، و دەبێتە هۆی دابەزینی بەرچاوی پلەکانی گەرما، بەجۆرێک لە سەنتەری شارەکان پلەکانی گەرما دادەبەزن بۆ نزیكەی 2 پلەی ژێر سفر، هاوکات ناوجە شاخاوییەکان پلەکانی گەرما تێیدا دادەبەزن بۆ 6 پلەی ژێر سفر.