كەشناسیی هەرێمی كوردستان، پێشبینی خۆی بۆ 48 سەعاتی داهاتوو بڵاو كردەوە و بەپێی پێشبینییەكان، پلەكانی گەرما روو لە نزمبوونەوە دەكەن و بارانیش دەبارێت.
ئەمڕۆ دووشەم 29ـی نیسان، كەشناسیی هەرێمی كوردستان بڵاوی كردووەتەوە، ئەمڕۆ ئاسمان ساماڵ بۆ نیمچەهەور دەگۆڕێت لەگەڵ بوونی كەمێك تۆز و خۆڵ، لە كاتەكانی شەودا نمەباران لە ناوچە جیاجیاكان دەبارێت و لە ناوچە شاخاوییەكان رێژەكەی زیاتر دەبێت.
بەپێی پێشبینییەكانی كەشناسی بۆ سبەی، ئاسمان نیمچەهەور بۆ هەوری تەواو دەگۆڕێت، لەگەڵ بوونی تۆز و خۆڵێكی كەم لە ناوچەكانی باشووری هەرێم. لە كاتەكانی دوایی نیوەڕۆ تاوەباران و بروسكە ناوچە شاخاوییەكانی باكوری رۆژهەڵات و رۆژهەڵاتی هەرێم دەگرێتەوە، پاشان زۆربەی ناوچەكانی هەرێم دەگرێتەوە بەشێوەی پچڕپچڕ، لە كاتەكانی شەودا كاریگەریی لاواز دەبێت، بەڵام بەهۆی ناجێگیریی بەرگەهەوای ناوچەكە بۆ رۆژانی تر، دابارینی ناو بەناو بەردەوامی دەبێت.
ئاماژە بەوەیش كراوە، سبەی خێرای با مامناوەند دەبێت، لە كاتەكانی دوایی نیوەڕۆ چالاك دەبێت بۆ سەرووی 40 كیلۆمەتر لە سەعاتێك و لە ناوچەكانی گەرمیان كاریگەریی زیاتر دەبێت. لە كاتەكانی شەودا كاریگەریی لاواز دەبێت و كەم دەبێتەوە بۆ دۆخی ئاسایی.
وەڵام بدەوه