بەشە خۆراکی نوێ دابەشدەکرێت

بەڕێوەبەری گشتیی بازرگانی ئاشكرای دەكات، لە هەرێمی كوردستاندا دەست بە دابەشكردنی بەشەخۆراكی مانگی 10ی ساڵی 2024 دەكرێت. دەشڵێت: "دابەشكردنی بەشەخۆراك بەردەوام دەبێت و بەشەخۆراکێكی زۆریش لە کۆگاکانی عێراق و هەرێمی كوردستاندا هەیە."
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان، ڕایگەیاند: "لە كۆگاكانمان بەشەخۆراك هەیە و لیست بە بریكارەكان دەدرێت و لەم هەفتەیەوە دەست بە دابەشكردنی بەشەخۆراكی مانگی 10ی ساڵی 2024 دەكرێت."
ئەوەشی خستە ڕوو، بەشەخۆراكی دەیەم هاوكاتە لەگەڵ ئەوەی، كە دابەشكردنی بەشەئاردی دەیەمیش بەرەو كۆتایی دەچێت.
ئاماژەی بەوەش دا: "بۆ بەشەخۆراكی دەیەم برنج سێ كیلۆیە، شەكر كیلۆیەكە، زەیت لیترێكە، 400 گرام دۆشاوی تەماتە، لەگەڵ نۆك و نیسك و ئارینۆك."
سەبارەت بەوەی بۆچی بەشەخۆراكی ساڵی رابردوو كەوتووەتە ئەمساڵ، نەوزاد شێخ کامیل، گوتی: "لە پلانی وەزارەتی بازرگانیی عێراق بوو، كە لە ساڵی 2024دا خۆراكی مانگی 10 مانگ دابەش بکرێت، بەڵام فریانەکەوتن و ئەو بەشەی كۆتایی کەوتە ساڵی نوێ."
ئەو بەرپرسەی وەزارەتی بازرگانی هەواڵێكی دڵخۆشكەری بە هاووڵاتییان دا و گوتی: "دابەشكردنی بەشەخۆراك بەردەوام دەبێت و بەشەخۆراکێكی زۆر لە کۆگاکانی عێراق و هەرێمی كوردستاندا هەیە و دوای تەواوبوونی بەشەخۆراكی دەیەم بەشەخۆراكی یەكەمی ئەمساڵ دابەش دەكرێت."
لە سەرێكی دیكەوە، دلێر عەبدولواحید، بەڕێوەبەری دابەشکردنی خۆراک لە هەولێر، ڕایگەیاند: "لەم هەفتەیە ئەو بریكارانەی پارەیان لە رێگەی كارتی بانكی رادەست كردووە، بەشەخۆراكیان پێ دەدرێت و بەشەخۆراكی دەیەم دابەش دەكرێت."