فەرمانێک بۆ هێزەکانی پێشمەرگە دەرچوو و کارێکیان لێ قەدەغە کرا

بڕیارێك بۆ پێشمەرگە دەرچوو

بەگوێرەی راگەیەنراوەكەی وەزارەتی پێشمەرگە، رێگریی دەكرێت لە بڵاوكردنەوەی هەموو جۆرە پۆستێك لە تۆڕە كۆمەڵایەتییەكاندا، كە نمایشكردنی ئەفسەر و فەرماندەكانی هێزی پێشمەرگە بێت بە جلوبەرگی سەربازییەوە، بەو مەبەستەش لەلایەن بەڕێوەبەرایەتیی گشتیی راگەیاندن و بەڕێوەبەرایەتیی گشتیی هەواڵگریی پێشمەرگە، بەدواداچوونی بەردەوام بۆ ئەو بابەتە دەكرێت.

لە راگەیەنراوەكەدا ئەوەش خراوەتەروو، هەموو جۆرە ناوزڕاندنێك لە تۆڕە كۆمەڵایەتییەكاندا "كۆمێنتی نەشیاو یان پۆست و بڵاوكردنەوەی وێنەی نەگونجاو"، ئەنجامدەرەكەی رووبەڕووی سزای یاسایی دەكاتەوە و دەدرێتە دادگای سەربازی، هەر ئەفسەر و پێشمەرگەیەك بەدەر لەو رێنوێنییانەی كە لە فەرمانەكەدا هاتووە ئەو كارانە ئەنجام بدات، رووبەڕووی سزای یاسایی دەبێتەوە.

لە خاڵی چوارەمی راگەیەنراوەكەدا ئاماژە بەوەش كراوە، "بەدواداچوون بۆ هەموو پەیجێكی ساختە و نادیار دەكرێت كە سووكایەتی بە ناو و ناوبانگی پێشمەرگە و فەرماندە سەربازییەكان بكات، ئەگەر كەسانی سەربازیی بن، بەپێی یاسای سزادانی سەربازی و ئەگەر مەدەنیش بن، سكاڵای یاساییان لەسەر تۆمار دەكرێت".