کاتی دابەشكردنی پارەی كارمەندانی هەڵبژاردن ڕاگەیاندرا

بەرپرسێکی کۆمسیۆنی هەڵبژاردن ئاشكرای دەكات، میكانیزمی دابەشکردنی پارە و پاداشتی دارایی کارمەندانی سەر سندووقەكانی ڕۆژی هەڵبژاردنی پەرلەمانی كوردسان دەستی پێكردووە و دەشڵێت: "دوو هەفتەی دیكە پارەكە دابەش دەكرێت."
خالید عه‌باس، به‌رپرسی ئۆفیسی دهۆكی كۆمیسۆنی هه‌ڵبژاردنی عێراق،  رایگەیاند: "رۆژی 26ی1ی2025، لەگەڵ لێژنەی دابەشكردنی پارەی كارمەندانی هەڵبژدارنی پەرلەمانی كوردستان كۆ بووینەوە، بۆ دانانی میكانیزمی خەرجكردنی پارەكە و چۆنیەتیی هەماهەنگی لەگەڵ ئیدارەی بانكەكان، بۆ دابەشكردنی پارەكە"
ئاماژەی بەوەش دا: "پارە خراوەتە سەر هەژماری ئێمە، هەندێك رێكاری كارگێڕی ماوە، لەوانە دروستكردنی چەك و دابەشكردنی پارە، هەروەها پاشان دەبێت ئۆفیسی بەغدا پەسندی بكات، ئەوكات پارەكە دابەش دەكرێت."
سەبارەت بە وادەی دابەشكردنی پارەكە، ئەو بەرپرسەی كۆمسیۆن گوتی: "پارەکە دوای دوو هەفتەی دیكە دابەش دەكرێت."
ئەو بەرپرسەی كۆمسیۆن ئەوەی ئاشكرا كرد، كێشەیەكی بانكی لەپشت دواكەوتنی دابەشكرنی پارەكە بوو، بەڵام ئەو كێشەیە چارەسەر كرا.
خالید عه‌باس روونیشی كردەوە: "ئەو كارمەندانەی، كە فەرمانبەری حكوومەت نەبوون، 250 هەزار دینار وەردەگرن و ئەوانەیشی فەرمانبەری حكوومەتن، بڕی 150 هەزار دینار وەردەگرن."
باسی لەوەش كرد، لەپاڵ ئەو كارمەندانە، بڕیار دەرچووە پارە بۆ كارمەنانی یەدەگیش خەرج دەكرێت.
لە هەڵبژاردنی خولی شەشەمی پەرلەمانی كوردستان، 41 هەزار و 300 كەس وەكوو كارمەندی كۆمسیۆن لەسەر سندووقەكانی دەنگدان بوون و له‌ شایسته‌ی دارایی سوودمه‌ند ده‌بن.