دوای هەفتەیەک کارکردن بە هاوبەشی، لەلایەن تیمی وەزارەتی دارایی عێراق و تیمە تەکنیکییەکانی وەزارەتی دارایی و ئابووریی کوردستان، ئەمڕۆ دووشەممە لیستی مووچەی مانگی یەک ئامادە کرا. لیستی خانەنشینان و تەرازووی پێداچوونەوە (میزان موراجەعە) مانگی 12ـی ساڵی ڕابردووش لە تەواوبووندایە.
کارەکانی کۆبوونەوەی هەردوو تیمی تەکنیکی وەزارەتی دارایی عێراق و بەڕێوەبەرایەتیی خانەنشینی عێراق لەگەڵ تیمی تەکنیکی وەزارەتی دارایی و ئابووریی هەرێمی کوردستان و یەکە ژمێریارییەکانی سەرجەم وەزارەتەکان و بەڕێوەبەرایەتی خانەنشینی کوردستان بەردەوامە.
کۆتایی ئەم هەفتەیە هەردوو تیمەکەی عێراق کارەکانیان تەواو دەبێت و دەگەڕێنەوە بەغدا، ئەگەر هیچ کێشەیەک ڕوونەدات ئێوارەی ڕۆژی شەممە 2025-2-1، شاندی باڵای کوردستان دەچێتەوە بەغدا و لەگەڵ ئەنجوومەنی ئابووریی عێراق و تەیف سامی، وەزیری دارایی کۆدەبنەوە، لەگەڵ خۆیان لیستەکانی مووچە و خانەنشینی دەبەن و گفتوگۆ لەبارەی ڕێککەوتنێکی نوێ دەکەن بۆ خەرجکردنی مووچەی ئەمساڵی خەڵکی کوردستان و شایستە داراییەکان.
وەڵام بدەوه