نرخی موەلیدە ئەهلیەکان ڕاگەیاندرا

سەرۆكی ئەنجوومەنی موەلیدە ئەهلییەكانی هەولێر رای گەیاند، نرخی موەلیدە بۆ ئەو مانگە دیاری كرا و لە نێوان 16 هەزار و 500 دینار بۆ 20 هەزار دینارە.

ئەمڕۆ شەموو یەكی شوبات، خۆران خۆرانی سەرۆكی ئەنجوومەنی موەلیدەكانی هەولێر،  رایگەیاند، ئەمڕۆ نرخی موەلیدە ئەهلییەكان ناو شاری هەولێر و دەوروبەر دیاری كرا.

زیاتر گوتی، تێكڕا كاركردنی سەعاتی موەلیدەكان رۆژانە بۆ مانگی یەك 14 سەعات بووە، ماوەی كاركردنی موەلیدەكان 31 رۆژە و لیژنەی تایبەت بە هێنانی گازوایل، بۆ یەك لیتر گازوایل بڕی 590 دیناری هێناوە لە بۆرسەی فرۆشتنی گازوایل.

باسی لەوەش كرد، بۆ یەك سەعاتی كاركردنی موەلیدە 45 دینار و نیو دەرچووە لە داتای لیژنەی موەلیدەكان تایبەت بە دیاریكردنی نرخی موەلیدە ئەهلییەكان، بەڵام وەك ئەنجوومەنی موەلیدەكان لەبەر بەرژەوەندیی گشتی و هاووڵاتییان، بۆ یەك سەعاتی كاركردنی موەلیدە 44 دینارمان هەژمار كرد.

روونی كردەوە، ناوشاری هەولێر نرخی یەك ئەمپێر لە نێوان 16 هەزار و 500 دینار بۆ 20 هەزار دینارە، نرخی یەك سەعاتی كاركردنی موەلیدە  44 دینارە، هەروەها ناوبازاڕی شاری هەولێر نرخی یەك ئەمپێر لە نێوان 10 هەزار دینار تا 12 دینارە، نرخی یەك سەعاتی كاركردنی موەلیدە 48 دینارە