زیاتر لە چوار هەزار و 838 مامۆستا و 274 سەرپەرشتیاری پەروەردەیی سەربە وەزارەتی پەرەوەردە خانەنشین دەبن، ئەمەش كێشەی كەمیی میلاك بۆ ئەو وەزارەتە دروست دەكات.
سەرچاوەیەك لە وەزارەتی پەروەردە، رایگەیاند، بۆ چارەسەركردنی ئەم كێشەیە، وەزارەتی پەروەردە نووسراوێكی بۆ ئەنجوومەنی وەزیران كردووە تا كۆتایی وەرزی دووەم خانەنشینی مامۆستایان رابگرێت.
سەرچاوەكە گوتی، تا ئێستە ئەنجوومەنی وەزیران بڕیاری لە سەر نووسراوەكەی وەزارەتی پەروەردە نەداوە، بۆیە ئەگەر بڕیار نەدا، وەزارەت ناچارە بەشێوەیەك ئەو كێشەیە چارەسەر بكات كە كێشە بۆ وەرزی دووەمی خوێندن لە كوردستان دروست نەبێت.
وەزارەتی پەروەردە كۆمەڵێك رێكار دەگرێتەبەر تا لەگەڵ خانەنشینی ئەو ژمارە زۆرەی مامۆستایان، پرۆسەی پەروەردە تووشی ئاستەنگ نەبێت.
بەپێی زانیارییەكان رێكارەكانی پڕكردنەوەی شوێنی مامۆستا خانەنشینكراوەكان دەست پێ كراوە، ئەو بەڕێوەبەرانەی خانەنشین بوون یەكێك لە یاریدەدەرەكانیان بەكاتی دەكرێتە شوێنیان، بەشە وانەی مامۆستا خانەنشینكراوەكانیش بەسەر مامۆستایانی قوتابخانەكاندا دابەش دەكرێن، بۆ ئەوەی بۆشایی لە ناوەندەكانی خوێندن دروست نەبێت.
سەرچاوەكە هۆكاری گرتنەبەری ئەو رێكارانەی لە جیاتی دانانی مامۆستایانی وانەبێژ و گرێبەست لە شوێنی خانەنشینبووەكان، گەڕاندەوە بۆ ئەوەی دەسەڵاتی دانانی مامۆستایانی وانەبێژ و گرێبەست لە شوێنی مامۆستایانی هەمیشەیی لە دەسەڵاتی پەروەردەكاندا نییە.
ئەوە لە كاتێكدایە یەكێتیی مامۆستایانی كوردستان رۆژی دووشەمی رابردوو داوای گۆڕینی پێشنیازەكەی وەزارەتی پەروەردە كرد بۆ بەردەوامبوونی مامۆستایانی خانەنشین لە وانەگوتنەوە تا كۆتایی ئەمساڵ، بەڵام بەمەرجی ئەوەی پاداشتیش بكرێن.
وەڵام بدەوه