ئەو هاشوو هووش و بەزمەی کۆمەڵێک کەسانی گوماناوی بە ناوی مامۆستایانی نارازی لە سلێمانی ناویانەتەوە، بە هیچ پێوەرێک ناچێتە خانەی دەربڕینی ڕای جیاواز و خۆپیشاندانەوە.
لەوەتەی دەسەڵاتدارانی بەغدا مووچە و شایستە داراییەکانی هەرێمی کوردستانیان کرد بە قوربانی حەزوئاوات و خولیا تائیفیە مەرکەزگەراییەکانی خۆیانەوە، هەرێمی کوردستان کەوتۆتە نێو دۆخێکی ئاڵۆزکاو و زۆر خراپی داراییەوە.
مەبەست لە بڕینی بودجەی کوردستان و گڵدانەوەی شایستە دارایی و ئابوریەکانی هەرێم، وەستاندنی گەشە ئابوریەکەی هەرێمی کوردستان و دروست کردنی پاشاگەردانی و نانەوەی ئاستەنگ بوو لە بەردەم گەشەی ئابوری و پێشکەوتنە بەرچاوەکانی سەرتاسەری هەرێم، لە رووی خزمەتگوزاری و رێگاوبان و ئاوەدانیەوە.
ئێستاکە دوای چەندین گەڕی دانوستان و گفتوگۆی ڕاستەوخۆی هەرێم لەگەڵ بەغدا، سەرەنجام هەردوولا گەیشتوونەتە رێککەوتنێکی سەرەتایی بۆ خەرج کردنی بودجەو موچەی هەرێم لە کاتی خۆیدا بە بێ دواکەوتن و گڵدانەوەی لە لایەن بەغداوە. ئەم پێکهاتنە ئاسۆیەکی پڕ لە هیوای خستۆتە بەردەم کوردستانیان بۆ تێپەڕاندنی قۆناغێکی دە ساڵەی سەختی ئابوری و تێپەڕاندنی دۆخەکە.
حکومەتی هەرێم بۆ گەیشتن بەم رێکەوتنە لە پێناو موچەخۆرانەوە، نەرمی و سازشی لەسەر مافە یاسایی و دەستوریەکانی هەرێم نواندووە. تەنانەت رازی بووە کۆمپانیای سۆمۆی عێراقی نەوتی هەرێم بفرۆشێت.
ئەوەی جێگەی گومان و سەرسووڕمان و هەڵوەستە لەسەر کردنە، مانگرتنی ژمارەیەکی کەمی مامۆستای سلێمانیە بەناوی ئازادی و ناڕازی بوون لە دۆخی ئابوریەوە. سەیرە ئەم دەرکەوتەیە رێک دوای ئەم رێککەوتنەی هەرێم و بەغدا دێت.
لە پاڵ ئەمەشدا هەوڵێکی ئیقلیمی هەیە بۆ لاڕێدابردنی رێککەوتنی هەرێم و بەغداو چەواشەکاری و بەکارهێنانی ناڕازایەتی مامۆستایان و قۆستنەوەی ئەم دۆخە بۆ نانەوەی ئاڵۆزی و پشێوی و ئاڵۆزکردنی دۆخی هەرێمی کوردستان.
بەداخەوە لە دۆخێکی لەمجۆرەی ئێستای هەرێمی کوردستاندا بە هۆی نابەرپرسیارەتی و فرەکوێخایی و هەڵتۆقینی چەندین هێزو بەرەو لایەنی گوماناوی و دەرکەوتنی چەندین بکەری بە ناو سیاسی و بە رووکەش خەمخۆر لە رووبەری کۆمەڵگادا، هەرچی پرسی سیاسی و ئابوری هەیە بەلارێدا دەبرێ و چەواشەکاری بووە بە رێبازو درووشمێکی رووخێنەرەوە.
هەر ئەمەشە وایکردووە هەرچی درووشم
و پەیام و ناڕەزایەتیەکی ڕاستەقینە هەیە، لە ناوەرۆک و پاکی و حەقیقی بەتاڵ بێتەوەو لە جوانی بکەوێ .
پاراستنی دەسکەوتەکان و دۆخی ئاشتی و ئارامی و پێکەوەیی و یەکگرتوویی چین و توێژەکانی کۆمەڵگای کوردستان، ئەرک و بەرپرسیارەتیەکی ئەخلاقی، نیشتیمان، ئایینی و کۆمەڵایەتیەو هەموو هێزەکان لە ئاست پاراستنی بەرپرسیارن.
وەڵام بدەوه