سەرۆكی حكوومەتی هەرێمی كوردستان و سەرۆكی ئیمارات كۆبوونەوە و دووپاتیان لە پێویستیی بەهێزكردنی هاوكاریی و هاوئاهەنگیی دوولایەنە كردەوە.
ئەمڕۆ چوارشەم 12ی شوبات، مەسروور بارزانی سەرۆكی حكوومەتی هەرێمی كوردستان لە شاری دوبەی، لەگەڵ شێخ محەمەد بن زاید ئال نەهیان سەرۆكی ئیمارات كۆبووەوە.
بەگوێرەی ڕاگەیەنراوی حكوومەتی هەرێمی كوردستان، لە كۆبوونەوەكەدا كە قوباد تاڵەبانی جێگری سەرۆك وەزیران ئامادەی بوو، بیروڕا لەبارەی دوایین پێشهات و گۆڕانكارییەكانی دۆخی گشتیی عێراق و ناوچەكە ئاڵوگۆڕ كران.
حكوومەتی هەرێمی كوردستان ئاماژەی بەوەش كردووە، "هەردوولا هاوڕابوون لەسەر پێویستیی بەهێزكردنی هاوكاریی و هاوئاهەنگیی دوولایەنە و پێشخستنی زیاتری پێوەندیی دۆستانەی نێوان هەرێمی كوردستان و ئیمارات لە بوارە جۆراوجۆرەكاندا."
سەرۆك وەزیرانی هەرێمی كوردستان بە سەرۆكایەتی شاندێكی باڵا چووەتە دوبەی و بەشداری لە لووتكەی جیهانیی حكوومەتەكان كرد، شاندەكەی حكوومەتی هەرێم پێكهاتوون لە سەرۆكی حكوومەت و جێگرەكەی، ساسان عەونی وەزیری شارەوانی و گەشتوگوزار، ئومێد سەباح سەرۆكی دیوانی ئەنجوومەنی وەزیران و ئامانج ڕەحیم سكرتێری ئەنجوومەنی وەزیران.
وەڵام بدەوه