زانیاری نوێ لەبارەی مووچەی دوو گەیشت

سەرچاوەیەك لە وەزارەتی دارایی و ئابووریی حكومەتی هەرێمی كوردستان ئاشكرای دەكات كە وردبینیكردنی لیستی مووچەی فەرمانبەرانی هەرێمی كوردستان لەلایەن بەغداوە دەستیپێكردووە.

 پرسی مووچە لەنێوان هەولێر و بەغدا بڕاوەتەوە و ڕێککەوتن کراوە، ڕێککەوتنەکە بۆ کۆی مانگەکانی ئەمساڵە، بەڵام بەهۆی خانەنشینبوونی ژمارەیەکی زۆری فەرمانبەر و چەند داواکارییەکی نوێی وەزارەتی دارایی عێراق ناردنی لیستی مووچەی مانگی شوبات دواکەوت.

 سەرچاوەیەك لە وەزارەتی دارایی حكومەتی هەرێمی كوردستان  میدیای ڕاگەیاند: ئەمڕۆ وردبینی لە لیستی مووچەی فەرمانبەرانی هەرێمی كوردستان لەلایەن وەزارەتی دارایی عێراقەوە دەستیپێكردووە و تاوەكوو ڕۆژی یەكشەممە كۆتایی دێت و چاوەڕوان دەكرێت لەدوای تەواوبوونی وردبینیكردنی لیستی مووچە، ڕاستەوخۆ پارەی مووچەی مانگی دووی ئەمساڵ لەلایەن بەغداوە خەرج بكرێت.

هیوا ئەفەندی، بەرپرسی فەرمانگەی تەكنەلۆجیا و زانیاریی حكومەتی هەرێمی كوردستان ڕۆژی 2025-02-25، ڕایگەیاند: لەگەڵ گەیشتنی بە وەزارەتی دارایی عێراق، دەست بە وردبینیکردن لە لیست و هەنگاوەکانی خەرجکردنی مووچە دەکرێت، بەمپێیە خەرجکردنی پارە لەلایەن بەغدا و دابەشکردنی لە کوردستان دەکەوێتە هەفتەی داهاتوو و مانگی سێ، ئەگەر زیاتر دوانەکەوێت.