وەزارەتی دارایی نابێت ئەم فەرمانبەرانە پێکەوە دەوام بکەن

وەزارەتی دارایی، بڕیارێکی بۆ قەدەغەکردنی کارکردنی پێکەوەیی به‌شێكی فەرمانبەران لە دەوامی فەرمی دەردەکات.

وەزارەتی دارایی هەرێمی کوردستان، بە نووسراوێك، کە لە 14ی9ی 2022دەرچووە و نووسراوەکەش بۆ هەموو بەڕێوەبەرایەتی و فەرمانگەکانی وەزارەتی دارایی نێردراوە، تیایدا جەخت لە بڕیارێک کراوەتەوە.

لە نووسراوەکەی داراییدا هاتووە: "نابێت فەرمانبەر لەگەڵ کەسی نزیکی پلە یەکی خۆی (هاوسەر، دایک، باوک، خوشک، برا، کوڕ و کچ) لە یەک فەرمانگە پێکەوە بن و پێکەوە دەوام بکەن".

ئاماژە بەوەش کراوە، بۆ چەند ناونیشانێک ئاساییە ئەو کەسانە لە یەک فەرمانگەش پێکەوە بن، هاتووە: " فەرمانبەرانی خزمەتگوار (پاشەوان، پاککەرەوە، چایەچی، پۆستەبەر، باغەوان، شۆفێر) ئەگەر کەسی یەکەمیشیان لە یەک فەرمانگە بێ ئاساییە".

وەزارەتی دارایی جەختی کردووەتەوە، کە دەبێ فەرمانگەکانی وەزارتەکە ناوەڕۆکی بڕیارەکە و گشتاندنەکە جێبەجێ بکەن، ئەوەش هاتووە: " دەبێت بەڕێوەبەرایەتی و فەرمانگەکانی وەزارەتی دارایی بۆ جێبەجێکردنی ئەو گشتاندنە و نووسراوەکە، لیژنە پێک بهێنن و تا پێش کۆتایی ساڵ لە ئەنجامەکەی ئاگادارمان بکەنەوە".

بەرپرسێکی وەزارەتی دارایی ئاشکرایکرد: "ئەو بابەتە تایبەتە بە فەرمانگەکانی وەزارەتی دارایی و بۆ هەموو وەزارەتەکان نییە و هۆکارەکەشی بۆ  ڕێکخستنەوەی بواری کارگێڕییه".

ئەو بەرپرسە گوتیشی: "لە فەرمانگەیەکی گەورەی وەزارەتی دارایی، زیاتر له 30 کەس دەوام دەکەن هاوسەری یەکترن، لە شوێنی دیكەیش خوشک و برا و خزمی دیكەی پلە یەک زۆرە، ئەوەش لە ڕووی کارگێڕیی باش نییە و کاریگەری بۆ سەر دەوام و ئیشوکارەکانمان هەیە".

ئەو بەرپرسە ئاشکراشی کرد، تاوەکوو کۆتایی ساڵ چاوەڕێی لیژنەکان دەکەن و بڕیاری خۆیان دەدەن.