لە هەولێر ئامادەکاری دەستی پێکرد

بە سەرپەرشتى پارێزگارى هەولێر، کۆبوونەوەیەکی تایبەت بە ئامادەکاریەکانی جەژنى قوربان ئەنجامدرا

ئەمرۆ سێشەممە 2025.6.3، بە سەرپەرشتى ئومێد خۆشناو، پارێزگارى هەولێر لە دیوانى پارێزگا، بە مەبەستى ئامادەکارى بۆ ڕۆژانى جەژنى قوربان کۆبوونەوەیەک ئەنجامدرا.

لە کۆبوونەوەکەدا، کە هەریەک لە جێگرانى پارێزگار و یاریدەدەر و قائیمقامى ناوەندى و بەڕێوەبەرانى دام و دەزگا ئەمنیەکان و فەرمانگە خزمەتگوزارییەکان ئامادەى بوون، وەک ئامادەکاریی بۆ جەژنى قوربان، لیژنەکانی قائیمقامییەتەکان و بازرگانی ڕاسپێردران لە نزیکەوە چاودێرى بازاڕ و نرخ و کوالێتى کەلوپەل و پێداویستییەکانى هاووڵاتییان بکەن.

لە تەوەرێکى ترى کۆبوونەوەکەدا، سەبارەت بە مەترسسییەکانى (تای خوێن به‌ربوون) کە نه‌خۆشییه‌كی ڤایرۆسی زۆر مه‌ترسیداره‌ بۆ سه‌ر ژیانی مرۆڤ و له‌ ڕێگه‌ی ئاژه‌ڵه‌وه‌ بۆ مرۆڤ ده‌گوازرێته‌وه‌ گفتوگۆ کرا، لەو بارەیەشەوە داواکرا هاوڵاتییان بۆ سەلامەتى تەندروستى خۆیان و ماڵ و منداڵ و کەس و کاریان قوربانى لە بەردەم دوکان، سەر شەقام، گەڕەک و کۆڵانەکان نەکەن و ئاژەڵ لە کوشتارگەکان بە پشکنینى ڤێتەرنەرى سەرببڕدرێت و بکرێتە قوربانى.

سەبارەت بە ئامادەباشی هێزەکانی پۆلیس و ئاسایشى ناوخۆ لە ڕۆژانى جەژن و پاراستنى ئاسایش و ئارامى هەولێرى پایتەخت و سەر و ماڵ و گیانى هاووڵاتییان، کۆبوونەوە تەئکیدى لە گرتنەبەرى هەموو ڕێکارێکى پێویست لە یەکە کارگێڕی و ئیدارییەکان و هێزە ئەمنییەکان و تیمە تەندروستییەکان و فەرمانگە خزمەتگوزارییەکان بۆ بەجێگەیاندنی ئەرکەکانیان کردەوە.

لە کۆتاییدا، پارێزگاری هەولێر ئاماژە بەوەدا بۆ رۆژانى جەژن هەموو ئامادەکارییەک و ئاسانکارییەک بکرێت بۆ هاتنى گەشتیاران، لەوبارەیەشەوە بەرێوەبەرایەتى گشتیى گەشتوگوزارى هەولێر و بەرێوەبەرایەتى بازگەکانى ڕاسپارد ئامادەکارى تەواو بکەن لە چۆنییەتى پێشوازیکردنیان.