سەندیكای پارێزەرانی كوردستان پەیامێکی دژی ڕاگرتنی مووچە لە لایەن بەغدا بڵاوکردەوە

پارێزەرانی كوردستان: حكوومەتی عێراق لە ژێر گوشاری گرووپێكی لە یاسا دەرچووە

سەندیكای پارێزەرانی كوردستان بەیاننامەیەكی بڵاو كردەوە و رای گەیاند، ئەو هەڵسوكەوتە نایاساییە وەزارەتی داراییی عێراق كە سزادانی بەكۆمەڵی مووچەخۆرانی هەرێمی كوردستان، كە بەپێی دەستوور و یاسا هەمان ماف و ئیمتیازاتی مووچەخۆرانی بەشەكانی تری عێراقیان هەیە، لەگەڵ پرەنسیپە یاساییەكان یەكناگرێتەوە.

سەندیكاكە لە بەیاننامەكەیدا دەڵێ‌، هەموو لایەك چاوەڕێ بوون كە وەزارەتی داراییی فیدڕاڵ و حكوومەتی فیدڕاڵ پابەندییەكانی خۆی بەرانبەر هاووڵاتییان و مووچەخۆرانی كوردستان جێبەجێ بكات و شایستە داراییەكان بەپێی رێكەوتننامەی واژۆكراو بنێرێت، كەچی بەبێ رەچاوكردنی دەستوور و یاسای بودجە و بڕیارەكانی دادگای فیدڕاڵ و بێباكانە و یەكلایەنە و بەشێوەیەكی نایاساییی بڕیاریان دا بە ڕاگرتن و وەستاندنی شایستە داراییەكان و مووچەی فەرمانبەران و خاوەن پێداویستیی تایبەت و كەسوكاری شەهیدان.

" ئەو هەڵسوكەوتە نایاساییە وەزارەتی داراییی عێراق كە سزادانی بەكۆمەڵی مووچەخۆرانی هەرێمی كوردستان، كە بەپێی دەستوور و یاسا هەمان ماف و ئیمتیازاتی مووچەخۆرانی بەشەكانی تری عێراقیان هەیە، لەگەڵ پرەنسیپە یاساییەكان یەكناگرێتەوە و ئەنجومەنی وەزیرانی حكومەتی فیدڕاڵیش دەسەڵاتی یاساییی خۆیان بۆ ناردنی مووچە بەكارنەهێنا" سەندیكای پارێزەرانی كوردستان وایان نووسیوە.

هەروەها داواكارن كە حكوومەتی فیدڕاڵ و وەزارەتی داراییی بەو بڕیارەی خۆیان دا بچنەوە و بە زووترین كات، مووچە و شایستە داراییەكانی فەرمانبەران و هەرێمی كوردستان بنێرن و نەكەونە ژێر فشارێكی هیچ لایەنێك و ئەجێندای گرووپی لەیاسا دەرچوو. " دیباجەی دەستووری هەمیشەیی عێراق بەبیری دەسەڵاتدارانی عێراق دەهێنینەوە، كە جێبەجێكردنی بڕگەكانی دەستوور زامنی یەكپارچەیی و یەكیەتیی عێراقە".