ئەمریکا لەبارەی کورد پەیامێکی نوێ بۆ بەغدا نارد

وەزارەتی دەرەوەی ئەمەریكا باسی رێككەوتنەكانی دوایی حكوومەتی هەرێمی كوردستان لەگەڵ كۆمپانیا ئەمەریكییەكان لە واشنتن دەكات، بەوەی هەنگاوێكی گرنگە بۆ چارەسەركردنی ئەو كێشە درێژخایەنەی لە كەرتی وزەی عێراق هەیە، داوا لە بەغدا و هەولێر دەكات هاوئاهەنگی بەپەلە بكەن بۆ جێبەجێكردنی پڕۆژەكان بەرەو سەربەخۆكردنی عێراق لە بواری وزەدا.

بەرپرسێكی وەزارەتی دەرەوەی ئەمەریكا بە "شەفەق نیوز"ی راگەیاند، ئەمەریكا وای دەبینێت كە دەكرێ عێراق سەقامگیرتر و خاوەن سەروەریی زیاتر بێت لە رێگەی بەدیهێنانی سەربەخۆیی لە بواری وزە و دووركەوتنەوە لە دەسەڵاتی ئێران، روونی كردەوە، ئەو رێككەوتننانەی بەم دواییە مەسروور بارزانی سەرۆكی حكوومەتی هەرێمی كوردستان لەگەڵ كۆمپانیا ئەمەریكییەكان بۆ پەرەپێدانی غازی هەرێم سەرپەرشتی كرد، خزمەت بەو ئامانجە دەگەیەنێت.


دووپاتی كردەوە، بۆیە ئەو جۆرە پڕۆژانە چ لە هەرێم بن یان لە عێراق لە بەرژەوەندیی هەموو عێراقییەكانە، بەتایبەتی لە سایەی ئەو تەنگژەی لە بواری كارەبا هەیە، بەرپرسە ئەمەریكییەكە روونی كردەوە، بۆیە هانی بەغدا و هەولێر دەدەین بۆ بەیەكەوەكاركردن لەپێناو دەستكردن بە بەرهەمهێنانی غاز بە زووترین كات.

شایەنی باسە لە ماوەی دوایی مەسروور بارزانی سەرۆكی حكوومەتی هەرێمی كوردستان سەردانی ئەمەریكای كرد، جیا لە بینینی دەیان بەرپرسی باڵا و كۆنگرێسمانی ئەو وڵاتە، سەرپەرشتیی واژووكردنی دوو رێككەوتنامەی بواری غازی لەگەڵ دوو كۆمپانیای ئەمەریكی كرد، بە مەبەستی پەرەپێدانی كەرتی غاز لە هەرێمی كوردستان كە سوودی تەنیا بۆ هەرێم نابێت، بگرە سوودی بۆ تەواوی عێراق هەیە، كە هەموو هاوینێك كێشەی لە غاز بۆ بەگەڕخستنی وێستگە كارەباییەكانی هەیە و لە لایەن ئەمەریكاشەوە گوشاری لەسەرە بۆ دەستبەرداربوونی كڕینی غاز لە ئێران، بۆیە ئەمەریكا بۆ دوورخستنەوەی بەغدا لە تاران، هانی پەرەپێدانی كەرتی غاز لە عێراق و هەرێمی كوردستان دەدات.