دڵنیایی بە هاووڵاتییانی هەرێمی کوردستان دەدرێت

کۆگاکانی کەلوپەلی خۆراک پڕ کراون لە خۆراک"
دووشەممە 16ـی حوزەیرانی 2025، نەوزاد شێخ کامیل، بەڕێوەبەری گشتی بازرگانی هەرێم لە کۆنفرانسێکی ڕۆژنامەوانیدا ڕایگەیاند: ئاڵوگۆڕی بازرگانیی نێوان هەرێمی کوردستان و وڵاتان لە دەروازە سنوورییەکان بەگشتی، بەردەوامە و ئاساییە، ئاماژەی بەوەشکرد، لە دەروازەی ئیبراهیم خەلیلەوە، کۆمپانیاکان بەردەوام کەلوپەلی خۆراک لە تورکیاوە دێننە نێو کوردستان، ڕایگەیاند: کۆگاکانی هەرێمی کوردستان کە بە ستانداری نێودەوڵەتی دروستکراون، پڕ کراون لە کەلوپەلی خۆراک و دەتوانرێت بۆ ماوەیەکی درێژ خۆراک لەو کۆگایانە هەڵگیرێت و تێک نەچێت، بۆیە مەترسی لەسەر کەمبوونەوەی خۆراک لە هەرێمی کوردستان نییە، بەڵکو کۆگاکان لە تەواوی کوردستان پڕ کراون لە کەلوپەلی خۆراک.
نەوزاد شێخ کامیل داوای لە هاووڵاتییان کرد، بەپێی پێویستی خۆیان کەلوپەلی خۆراک بکڕن، ترسی ئەوەیان نەبێت کەلوپەلی خۆراک لە بازاڕەکان نەمێنێت، ڕایگەیاند: بەپێی ئەو پلانەی دایان ناوە لەگەڵ کەرتی تایبەت، ڕۆژانە کەلوپەلی خۆراکی زۆر دەخەینە بازاڕ و مۆڵ و مارکێتەکانەوە و ناهێڵین خۆراک لە بازاڕ کەمبێتەوە.