هەواڵی خۆش بۆ مووچە خۆران گەیشت

پارێزگاری هەولێر ئاشكرای دەكات، هەفتەی داهاتوو دەست بە دابەشكردنی زەوی بەسەر فەرمانبەران دەكرێت و ئاشكراشی دەكات: "تەنیا ناو دەرچوون نییە، بەڵكوو ئەمجارە راستەوخۆ فەرمانبەر ژمارە و تاپۆ و شوێنی زەوییەكەی پێ دەدرێت."

ئومێد خۆشناو، پارێزگاری هەولێر، رایگەیاند: "لە پێدانی زەوی بە فەرمانبەران و خانەنشینان و پێشمەرگە و كارمەندانی ناوخۆ لەناو سەنتەری شاری هەولێر، نزیكەی 60 هەزار سووودمەند دەبن و لەدەرەوەی شاریش نزیكەی 45 هەزاریان سوودمەند دەبن."

ئاماژەی بەوەش دا: "رەنگە لەو هەفتەیەدا كارەكان تەواو نەبێت، بەڵام لە هەفتەی داهاتوودا لە شاری هەولێر دابەشكردنی زەوی دەستپێدەكات."

ئاشكراشی كرد، دابەشكردنی زەوییەكانیش شارەوانی بە شارەوانی دەبێت و ئەو زەوییانەی ئامادەن دابەش دەكرێن، گوتیشی: "پڕۆسەی دابەشكردنی زەوی بەشێوەیەكی خێرا دەڕوات بەڕێوە و تیمەكانی سەرۆكایەتیی شارەوانی و بەرێوەبەرایەتیی گشتیی شارەوانییەكان ماندوونەناسانە كارەكانی خۆیان دەكەن و بەردەوامن و پڕۆسەی دابەشكرنی زەوی گەیشتە قۆناغی كۆتایی."

هەر فەرمانبەر و مامۆستا و پێشمەرگەیەک و كارمەندێكی ناوخۆ كە ‏هەشت ساڵ خزمەتی هەبێت و هەر خانەنشینێكیش لە كاتی فەرمانبەریدا سوودمەند نەبووبێت، زەوییەكی 200 مەتری پێ دەدرێت.

پارێزگاری هەولێر هەواڵێكی دڵخۆشكەری بۆ پێشمەرگە و فەرمانبەران و هێزەكانی ناوخۆ راگەیاند و گوتی: "ئەمجارە تەنیا ناو دەرچوون نییە، بەڵكوو ئەمجارە راستەوخۆ فەرمانبەر ژمارە و تاپۆ و شوێنی زەوییەكەی پێ دەدرێت، ئەوەش مافی فەرمانبەران و مووچەخۆرانە و بڕیاری سەرۆكی حكوومەتی هەرێمی كوردستانە و جێبەجێ دەكرێت."

ڕۆژی 27ی 03ی 2024، ئەنجوومەنی وەزیرانی هەرێمی کوردستان بڕیاری دا بە پێدانی زەوی بەو فەرمانبەرانەی کە سوودمەند نەبوونە و لە رۆژی 31ی 5ی 2024 وەزارەتی شارەوانی رێنوێنیی ژمارە 2ی ساڵی 2024ی دابەشكردنی زەوی بەسەر فەرمانبەران لە رۆژنامەی وەقایعی فەرمیی كوردستان بڵاو كردەوە.