سه‌رۆكی حکومەت بەڕێز مەسرور بارزانی پێشوازی لە شاندێکی سەربازی بەریتانی دەکات

ئه‌مڕۆ چوارشەممە 7/30 , مەسرور بارزانى سه‌رۆكى حکومەتی هه‌رێمى كوردستان، پێشوازى لە شاندێکی سەربازی بەریتانی بەسەرۆکایەتی ئیدوارد ئاڵگرن ‌ڕاوێژكارى باڵای به‌رگريى به‌ريتانى بۆ کاروباری‌ ڕۆژهه‌ڵاتى ناوه‌ڕاست و باكوورى ئەفریقا کرد.
لە کۆبوونەوەدا کە ئەندرو بیزلی کونسولی گشتیی بەریتانیا لە هەرێمی کوردستان ئامادەی بوو ، دوایین گۆڕانکاری و  پەرەسەندنەکانی دۆخی ئەمنیی عێراق و ناوچە و پتەوکردنی هەماهەنگیی و هاریکاری ئەمنی و سەربازی لە نێوان هەرێمی کوردستان و بەریتانیا و بەردەوامبوون و پشتیوانیکردنی چاکسازییەکانی وەزارەتی پێشمەرگە تاوتوێ کرا.
سەرۆکی حکومەت سوپاسی و پێزانینی هەرێمی کوردستانی بۆ پشتگیریی و هاریکاریی شانشینی یەکگرتوو دەربڕی.
هەروەها جەخت لە پێویستیی ڕێزگرتن لە قەوارەی دەستووریی هەرێمی کوردستان و مسۆگەرکردنی شایستە داراییەکانی خەڵکی کوردستان و ڕێگریکردن و کۆتاییهێنان بە هێرشی تیرۆریستی و تێکدەرانەی درۆنی بۆ سەر هەرێمی کوردستان کرایەوە.
دوایین پەرەسەندنەکانی دۆخی سووریا و ڕۆژهەڵاتی ناوەڕاست بەگشتی ، بەشێکی دیکەی گفتوگۆکان بوو.