وەزیری تەندروستیی حکوومەتی هەرێمی کوردستان رای گەیاند، لەگەڵ بەرز نرخاندنی توانای پزیشکان و خزمەتگوزارییە تەندروستییەکان، بە هیچ شێوازێک لە بەرانبەر سەرپێچیی پزیشکان و نەخۆشخانەکاندا بێدەنگ نابن و سزای سەرپێچیکاران دەدەن.
سامان بەرزنجی لە لێدوانێکدا ئاماژەی بەوە دا کە پزیشکانی کوردستان بە هەزاران نەشتەرگەریی رۆژانە ئەنجام دەدەن و رێژەی پەککەوتن زۆر کەمە، ئەمەش وایکردووە کەمترین نەخۆش پێویستی بە دەرەوەی وڵات هەبێت. سەبارەت بە کەرتی دەرمانیش روونی کردەوە کە جیاوازیی نرخ لە کوردستان کەمە و بۆ جیاوازیی کۆمپانیاکانی دەرمان دەگەڕێتەوە.
لە تەوەرێکی تری قسەکانیدا، وەزیری تەندروستی جەختی لە گرنگیی دامەزراندنی پزیشکانی نوێ کردەوە بەهۆی بوونی فشارێکی زۆر لەسەر پزیشکانی ئێستا و خانەنشینبوونی ژمارەیەکی زۆریان. ئاماژەی بەوەش دا کە هەوڵەکان چڕ کراونەتەوە بۆ چارەسەرکردنی کێشەی دامەزراندن لە پڕۆژەیاسای بودجەی عێراقدا و لە ماوەیەکی نزیکدا هەواڵی خۆش دەبێت.
لەبارەی پڕۆژەکانی تری کەرتی تەندروستیشەوە، ئەوە خستە روو کە کارنامەی بیمەی تەندروستی لە کابینەی نۆیەمدا ئاراستەی پەرلەمان کراوە و چاوەڕوان دەکرێت دوای کاراکردنەوەی بکرێتە یاسا. هەروەها لە بواری چارەسەری شێرپەنجەدا،جگە لە کردنەوەی نەخۆشخانە لە دهۆک و هەڵەبجە، نەخۆشخانەیەکی گەورە لە هەولێر دەکرێتەوە کە دەبێتە یەکێک لە ناوەندە گرنگەکانی عێراق و ناوچەکە.
#kurdistanpress
وەڵام بدەوه