ئاگاداری گرنگی بۆ هەموو هاوڵاتیان هات

بەڕێوەبەری گشتیی بازرگانیی هەرێم رای دەگەیەنێت، پڕكردنەوەی فۆرمی بەشەخۆراك بەردەوامی هەیە، تا ئێستە لە هەرێمی كوردستاندا رێژەیەكی بەرچاو لە خێزانەكان ئەو فۆرمە ئەلیكترۆنییەیان پڕ كردووەتەوە.

ئەمڕۆ یەكشەم 17ی ئاب، نەوزاد شێخ كامیل بەڕێوەبەری گشتیی بازرگانی هەرێم،  رایگەیاند، پڕكردنەوەی فۆرمی ئەلیكترۆنی بەشەخۆراكی هاووڵاتییان بەردەوامی هەیە، ئێستە لە هەرێمی كوردستان لە ئاستێكی بەرزدا فۆرمەكە پڕ كراوەتەوە و تا 25ی مانگیش بەردەوامیی هەیە.

روونی كردەوە، لە هەرێمی كوردستاندا 84%ی خێزانەكان ئەو فۆرمەیان پڕ كردووەتەوە، لە چەند رۆژی داهاتوودا زیاتر دەبێت، بەڵام تا ئێستە بەشەخۆراكی هیچ خێزانێك رانەگیراوە، لە دوای ئەو كاتەی دیاری كراوە، پڕكردنەوە دەبێت بە پارە.

لای خۆیەوە ئاراس محەمەد بەڕێوەبەری پسوولەی خۆراكی سلێمانی،  رایگەیاند، تا ئێستە 85%ی خەڵكی پارێزگای سلێمانی، فۆرمی ئەلیكترۆنیی بەشەخۆراكیان پڕ كردووەتەوە، لە كاتێكدا لە شارەكە 600 هەزار خێزان هەن. 

فۆرمی ئەلیكترۆنیی بەشەخۆراك لەلایەن عێراقەوە دانراوە كە هاووڵاتییان بە شێوەیەكی ئەلیكترۆنی تۆمار دەكرێن، یەكێك لە خاڵە ئەرێنییەكانی ئەو سیستمە ئەوەیە، ناوی دووبارە و ئەوانەی لە عێراق ناژین، بەشەخۆراكەكەیان دەبڕێ‌.