هەواڵێکی خۆش بۆ خەڵکی شاری سلێمانی

کارکردن لە پڕۆژەی شەقامی سەد مەتری سلێمانی بەردەوامە، وتەبێژی شارەوانی سلێمانیش لەوبارەیەوە دەڵێت: '27 کیلۆمەتری شەقامەکە تەواو بووە'. 

یەکێک لە پڕۆژە ستراتیژی و گرنگەکانی حکومەتی هەرێمی کوردستان، کە لە کابینەی نۆ بەردی بناغەی دانراوە و چووتە بواری جێبەجێکردنەوە، پڕۆژەی شەقامی 100 مەتری سلێمانییە، کە بە شاڕەی بابان ناسراوە و بە سێ قۆناغ دەست بە کارەکانی کراوە.

زەردەشت ڕەفیق، وتەبێژی شارەوانی سلێمانی ڕایگەیاند: کارکردن لە پڕۆژەی شەقامی 100 مەتری سلێمانی بەردەوامە، تاوەکو ئێستا 75%ی کارەکانی تەواو بووە.  وتەبێژی شارەوانی سلێمانی وتی: بەگوێرەی پلان بڕیارە لە مانگی 9ی ساڵی 2026 شەقامەکە بەڕووی هاووڵاتییاندا بکرێتەوە.

درێژی شەقامی 100 مەتری سلێمانی 32 کیلۆمەترە، تاوەکو ئێستا 27 کیلۆمەتری تەواو بووە، چینی یەکەم و دووەم و سێیەمی شەقامەکە قیڕ کراوە.

تێچووی شەقامەکە 400 ملیار دینارە و لەسەر بودجەی حکومەتی هەرێمی کوردستان جێبەجێ دەکرێت.

بە تەواوبوونی پڕۆژەکە، ئەو لۆد و قەرەباڵخییەی لەسەر شەقامەکانی ناو شار هەیە کەم دەبێتەوە، هەروەها ئاسانکارییەکی زۆر بۆ هاتووچۆ دروست دەکات.