داوای چارەنووسی بێسەروشوێنانی لالەزار دەکرێت

بەری گەل/ رەوتەكەی لاهوور شێخ جەنگی/ داوا لە دەستەی مافی مرۆڤی هەرێمی كوردستان دەكەن هەوڵ بدەن بۆ ئەوەی چارەنووسی بێسەروشوێنانیان دوای شەڕەكەی 22ی ئابی لالەزار ئاشكرا بكرێت. 

بۆ جاری دووەم بەرەی گەل ئەمڕۆ سەردانی دەستەی مافی مرۆڤیان كردووە، شادمان حەسەن سەركردە لە بەرەی گەل، بە "وشە"ی گوت، سەردانی دەستەی سەربەخۆی مافی مرۆڤی هەرێمی كوردستانم كرد، لەگەڵ مونا یاقو سەرۆكی دەستەكە كۆبوومەتەوە سەبارەت بە ڕەوشی گیراو و بێ سەروشوێنانی شەڕەكەی ڕۆژی ٢٢ی ئابی شاری سلێمانی. 

ئاماژەی بۆ ئەوەیش كرد كە داوایان كردووە هەولی بەردەوامی خۆیان بدەن بۆ دیاری كردنی چارەنووسی بێ سەروشوێنان و باشكردنی ڕەوشی گیراوەكان و دادگایكردنیان بەشێوەیەكی دادپەروەرانە.

ئەو هێمای بۆ ئەوە كرد كە ئەوانەی گیراون بەشێكیان هێشتا لەلایەن كەسوكارەكانیانەوە نەبینراون و داوا دەكەن رێ بە كەسوكاریان بدرێ‌ سەردانیان بكەن. 

پێشتر دەستەی مافی مرۆڤ سەردانی لاهوور شێخ جەنگیان لە گرتووخانە كردبوو، رایانگەیاند، داوای پەرتووكی كردووە و رەوشی تەندروستی باشە. 

رۆژی 22ی ئاب، هێزەكانی یەكێتی هەڵیانكوتایە سەر لالەزار و دوای شەڕ و پێكدادانی سێ‌ سەعاتی لاهوور شێخ جەنگی گیرا و لەشەڕەكەدا چەندان كەس لە هێزی هەردوولا سووتان و كوژراون و بێسەروشوێن بوون.