پێویستە عێراق پەلە بكات بۆ رێككەوتن لەگەڵ هەرێمی كوردستان

پسپۆڕێكی ئابووری رای دەگەیەنێت، پێویستە عێراق پەلە بكات بۆ رێككەوتن لەگەڵ هەرێمی كوردستان و هەناردەكردنەوەی نەوت، چونكە هەناردەكردنەوەی نەوتی هەرێمی كوردستان و كەركووك، لەم كاتەدا بۆ عێراق زۆر گرنگە.

ئەمڕۆ شەموو شەشی ئەیلوول، نەبیل مەرسوومی پسپۆڕی ئابووری عێراق رای گەیاند، لەبەر رۆشنایی زیادبوونی پێشبینیكراوی پشكی بەرهەمهێنانی نەوتی عێراق لە چەند مانگی داهاتوودا، زۆر گرنگە كە بە خێرایی كێشەی نەوتی نێوان ناوەند و هەرێمی كوردستان چارەسەر بكرێت.

باسی لەوەش كردووە، بەگوێرەی سەرچاوەكانی ئۆپێك، هەناردەی نەوتی خاوی عێراق لە مانگی ئابدا گەیشتووەتە سێ ملیۆن و 458 هەزار بەرمیل لە رۆژێكدا، كە سەرجەم لە رێگەی دەریا و باشوورەوە هەناردە كراون، بەوەش عێراق نزیك بووەتەوە لەوپەڕی توانای هەناردەكردنی خۆی كە سێ‌ ملیۆن و نیو بەرمیلە لە رۆژێكدا.

 بەگوتەی مەرسوومی، زۆر گرنگە بە خێرایی كێشەی نەوتی نێوان ناوەند و هەرێمی كوردستان چارەسەر بكرێت، لەگەڵ توركیا بگەنە لێكتێگەیشتن بۆ دەستپێكردنەوەی پەمپكردنی نەوت لە بۆری جەیهانەوە، بۆ ئەوەی عێراق بتوانێت نەوتی هەرێم و كەركووك هەناردە بكات، كە بڕەكەی نزیكەی نیو ملیۆن بەرمیلە لە رۆژێكدا، بەوەش بەشدار دەبێت لە چارەسەركردنی ئەو تەنگژە داراییانەی كە عێراق ئێستە بەدەستیەوە دەناڵێنێت.