سزای سەر سلێمانی درێژ كرایەوە

لەلایەن توركیاوە سزاكانی سەر فڕۆكەخانەی سلێمانی بۆ سێ‌ مانگی تر درێژ كرایەوە و تا ساڵی داهاتوو بەردەوام دەبێت.

ئەمڕۆ دووشەم شەشی تشرینی یەكەم، فڕۆكەخانەی سلێمانی بڵاوی كردەوە، توركیا ماوەی ڕاگرتنی گەشتە ئاسمانییەكانی بۆ فڕۆكەخانەی نێودەوڵەتیی سلێمانی، تــا شەشی كانوونی دووەمی 2026 درێژ كردەوە.

ئاماژە بەوەش كراوە، لە ئاگادارینامەیەكدا دەسەڵاتی فڕۆكەوانیی شارستانیی توركیا، بڕیاری ماوەی ڕاگرتنی گەشتە ئاسمانییەكان و ئاسمانی وڵاتەكەی بەڕووی گەشتەكانی فڕۆكەخانەی نێودەوڵەتیی سلێمانی تـــــا 2026/1/6 درێژ كردووەتەوە.

ئەوە لە كاتێكدایە پێشتر بۆ چوار جاری تر گەشتی ئەو فڕۆكەخانەیە بۆ توركیا ماوەی راگیرانی درێژ كراوەتەوە، ئەوەش بەهۆی بڕیارێكی توركیا كە دەڵێت لەو فڕۆكەخانەیە یارمەتیی چەكداری نایاسایی دراوە.