بەردی بناغەی پڕۆژه‌ی نوێ لە هەولێر دانرا

ساسان عەونی، وەزیری شارەوانی و گەشتوگوزار: ئەم پڕۆژەیە به‌ گوژمه‌ی 3 ملیار و 550 ملیۆن دینار لە چوارڕیانی مەخموور تا ڕێگەی مووسڵ جێبەجێ دەكرێت

- لە ڕۆژانی داهاتوودا پڕۆژەی گرنگ لە شار و شارۆچكەكانی هەرێمی كوردستان ڕادەگەیەندرێن

له‌سه‌ر بودجه‌ی وه‌زاره‌تی شاره‌وانی و گه‌شتوگوزار به‌ گوژمه‌ی 3 ملیار و 550 ملیۆن دینار پڕۆژه‌ی سەرلەنوێ قیرتاوكردن و نۆژەنكردنەوەی شه‌قامی 100مه‌تریی هه‌ولێر له‌ چوارڕیانی ڕێگه‌ی مه‌خموور تا چوارڕیانی مووسڵ دەستیپێكرد و وەزیری شارەوانی و گەشتوگوزاریش دەڵێت ئەو هەموو كار و پڕۆژە و ئاوەدانییە لە ئەنجامی بەرنامەڕیژیی ڕێزدار مەسرور بارزانی، سەرۆكی حكوومەتی هەرێمی كوردستان بۆ خۆشگوزەرانی و ئاسوودەیی خەڵكە و دەشڵێت لە ڕۆژانی داهاتوودا پڕۆژەی گرنگ لە شار و شارۆچكەكان ڕادەگەیەندرێن.

ئه‌مڕۆ سێشه‌ممه‌ 7ی ئۆكتۆبه‌ری2025، لەژێر چاودێریی ساسان عه‌ونی، وه‌زیری شاره‌وانی و گه‌شتوگوزار و بە ئامادەبوونی ئومێد خۆشناو، پارێزگاری هه‌ولێر و ئەندازیاڕ، كارزان عه‌بدولهادی، سه‌رۆكی شاره‌وانیی هه‌ولێر و ژمارەیەكی دیكە لە بەڕێوەبەران و سەرۆكی فەرمانگەكان له‌سه‌ر بودجه‌ی وه‌زاره‌تی شاره‌وانی و گه‌شتوگوزار به‌ردی بناغه‌ی پڕۆژه‌ی قیرتاوكردن و سەرلەنوێ نوێژنكردنەوەی شه‌قامی 100مه‌تریی هه‌ولێر له‌ چوارڕیانی ڕێگه‌ی مه‌خموور تا چوارڕیانی مووسڵ داندرا.

ساسان عەونی، وەزیری شارەوانی و گەشتوگوزار لە ڕێوڕەسمی دانانی بەردی بناغەی پڕۆژەكە و لە بەشێكی قسەكانیدا خۆشحاڵی خۆی بە جێبەجێكردنی پڕۆژەكە دەربڕی و ئاماژەی بەوەش كرد قیرتاوكردن و سەرلەوێ نۆژەنكردنەوەی شەقامی 100مەتریی هەولێر كە شەقامێكی زۆر گرنگە بۆ هاتوچۆی شاری هەولێر و نۆژەنكردنەوەی هۆكارێكی گرنگ دەبێت بۆ ئاسانكاریی هاتوچۆ و نەهێشتنی قەرەباڵغی لەنێو سەنتەری شاری هەولێردا.

ساسان عەونی، وەزیری شارەوانی و گەشتوگوزار گوتیشی: پڕۆژه‌ی قیرتاوكردن و سەرلەنوێ نوێژنكردنەوەی شه‌قامی 100مه‌تریی هه‌ولێر له‌ چوارڕیانی ڕێگه‌ی مه‌خموور تا چوارڕیانی مووسڵ، درێژاییەكەی بە چوون و هاتن، زیاتر لە هەشت كیلۆمەترە و بە گوژمەی 3 ملیار و 550 ملیۆن دینار لەسەر بودجەی وەزارەتی شارەوانی و گەشتوگوزار لە ماوەی 120 ڕۆژدا بەپێی ستانداردەكان جێبەجێ دەكرێت.

ساسان عەونی، وەزیری شارەوانی و گەشتوگوزار ئاماژەی بەوەش كرد، ئاوەدانی و نۆژەنكردنەوە و بنیادنانی پڕۆژەی گەورە و ستراتیژی و جێبەجێكردنی فیكرەكان لە نەبوونەوە بە خوڵقكردنی ئێستا بووەتە سەركاروان و بەرنامەی كابینەی نۆیەمی حكوومەتی هەرێمی كوردستان كە دەستی ئاوەدانی هەر ڕۆژەی لە شار و لە شارۆچكەیەكە. ئاماژەی بەوەش كرد ئەو هەموو ئاوەدانییەی ئێستا لە شار و شارۆچكەكان دەبینرێت، لە ئەنجامی ئەو هەموو كارە گرنگ و بەرنامەڕێژییەیە كە جەنابی سەرۆكوەزیران ڕێزدار مەسرور بارزانی، سەرۆكی حكوومەتی هەرێمی كوردستان و هەموو وەزارەت و فەرمانگەكانی حكوومەت لەپێناو خۆشگوزەرانی و ئاسوودەیی خەڵك وەكوو ئەركی سەرشانمان جێبەجێیان دەكەین، گوتیشی: لە كار و خزمەتكردن بەردەوام دەبین و لە ڕۆژانی داهاتووشدا پڕۆژەی گرنگتر بۆ شار و شارۆچكەكانی هەرێمی كوردستان جێبەجێ دەكرێن.