هێرشکرایە سەر نووسینگەی کاندیدێک

موسەننا عەزاوی، کاندیدی هاوپەیمانی عەزم، لە هەژماری خۆی لە تۆڕی کۆمەڵایەتی فەیسبووک نووسیویەتی: بە توندی ئیدانە و شەرمەزاری ئەو هێرشە ترسنۆکانە دەکەین کە کرایە سەر نووسینگەکەمان لە شارۆچکەی یوسفیە و بووە هۆی برینداربوونی یەکێک لە براکانمان.

ئەو کاندیدە دەڵێت: ئیدانەی ئەو کارانەی دوای هێرشەکەش دەکەین، وەک وێنەگرتن، ناوزڕاندن، هەڕەشە و هەوڵی سوکایەتیکردن، کە هیچ پەیوەندییەکیان بە رەوشت و بەهاکانەوە نییە.

ئەو کاندیدە دەشڵێت: باوەڕێکی پتەومان هەیە کە یاسا لە سەرووی هەمووانەوەیە و هێرشکاران زوو یان درەنگ سزای کردەوەکانیان وەردەگرن.

ئەمە لە کاتێکدایە کە رۆژی چوارشەممە، 15ی تشرینی یەکەمی 2025، سەفا مەشهەدانی، کاندیدی هاوپەیمانی سیادە بۆ هەڵبژاردنی پەرلەمانی عێراق، بەهۆی تەقینەوەی بۆمبێکی لکێنراو بە ئۆتۆمبێلەکەیەوە تیر*ۆرکرا.