مژدەی خۆش هەیە بۆ هاوڵاتیانی قۆشتەپە

بڕیارە بەمنزیكانە پڕۆژەی ئاوی قوشتەپە بكرێتەوە، بەهۆیەوە قوشتەپە و 73 گوندی سنوورەكە واز لە بەكارهێنانی ئاوی بیرەكان دەهێنن و بۆ دەیان ساڵی تر كێشەی ئاو لەو سنوورە چارەسەر دەبێت.

ئەمڕۆ دووشەم 20ـی تشرینی یەكەم، ئاری ئەحمەد بەڕێوەبەری ئاو و ئاوەڕۆی هەرێمی كوردستان،  ڕایگەیاند، پڕۆژەی ئاوی قوشتەپە ئێستە لە تاقیكردنەوەدایە و هێڵەكان خاوێن كراونەتەوە، بەهۆی ئەم پڕۆژەیەوە ئاوی خاوێن بۆ قەزای قوشتەپە و شارەدێی بێستانە و نزیكەی 73 گوند تەرخان دەكرێت.

زیاتر گوتی، ئەو پڕۆژەیە زۆر گرنگە و لە سنووری قەزای قوشتەپە 165 هەزار كەس لەم پڕۆژەیە سوودمەند دەبن و سەرووی 90 %ـی پڕۆژەكە تەواو بووە.

ڕۆژی پێنجشەمی ئەم هەفتەیە، پڕۆژەی ئاوی قوشتەپە دەستبەكار دەبێت و ئاوی خاوێن بۆ ماڵان دەنێردرێت، دواتر كارەكانی ئەو بەشەی كە دەمێنێتەوە تەواو دەكرێت تا تەواوبوونی پڕۆژەكە.

ساڵی رابردوو مەسروور بارزانی سەرۆك وەزیرانی كوردستان، بەردی بناغەی پڕۆژەی ئاوی قوشتەپەی دانا كە بە گوژمەی 222 ملیار دینار جێبەجێ دەكرێت، سنووری قوشتەپە كە قووڵیی بیرەكان تێیدا گەیشتبووە زیاتر لە 500 مەتر رزگاریان دەبێت لە بێ‌ ئاوی