سیستەمی پۆست کۆد لە هەولێر چالاک دەکرێت

هەولێر ... کۆبونەوەیەك سەبارەت بە پڕۆسەی دانانی پۆست‌کۆد لە سەنتەری شار بەڕێوەچوو ئەمڕۆ دووشەممە 2025.10.20، بەسەرپەرشتی ئومێد خۆشناو، پارێزگاری هەولێر، لە چوارچێوەی پەرەپێدانی پۆست كۆد و دامەزراندنی سیستەمێكی یەکگرتووی دانانی ژمارە و ناونیشانکردن شەقام و كۆڵان و شوێنە گشتیەكانی سەنتەری شاری هەولێر، کۆبونەوەیەک لەگەڵ بەرێوبەرایەتیەكانی گشتی ئامار و پۆستەی هەولێر و لێژنەی پێکهێنراو بۆ ئەو مەبەستە بەرێوەچوو. لە کۆبونەوەکەدا، دوای ئەوەی گفتوگۆ لەبارەی كاركردن بە سیستەمی پۆست كۆد و دانانی ژمارە و ناونیشانی تایبەت بۆ هەر ناوچە و كووچە و كۆڵانێك و شەقامێكی شار بەشێوەیەكی گشتی كرا، كە ئامانج لێی پێشكەشكردنی ئاسانکاری ناردن و وەرگرتن و دیاریکردنی گەڕەك و ناوچەكانی تری شارەكەیە و بەردەوامیش ئەو سیستەمە کار دەکات بۆ نوێکردنەوە و زیادکردنی کۆد پۆست بەشێوەیەكی یەکسان. تیشك خرایەسەر كارە تەكنیكیەكان و چۆنیەتی جێبەجێكردنی پڕۆسەكە بۆ دیاریکردنی شێوەی جۆغرافیای پۆست‌ کۆد و یەکسانکردنی سیستەمەکە بە گوێرەی یاسا نێودەوڵەتییەکان بۆ سەرنتەری شار و قەزاو ناحییەكانی سنووری پارێزگای هەولێر. لەوبارەیەشەوە پارێزگاری هەولێر، وێڕای دەستخۆشی لە ئامادەبووان، هەموو پاڵپشتی و هاریكارییەكی پارێزگای هەولێری بۆ سەرخستنی كارەكانیان دووپاتكردەوە و لایەنە پەیوەندیدارەكانیشی ڕاسپارد دەستبكەن بە دیراسەتكردنی زیاتری خاڵی دەستپكی پڕۆسەكە و دەستنیشانكردنی بودجەی پێویست بۆ ڕایكردنی كارەكان. جێگەی باسە، سیستەمی پۆست كۆد، سیستەمێكی جیهانیە و لە دوای گەشەپێدانی زانیاری و تەکنەلۆژیا، لەپێناو یەکگرتووتی و ئاسانکاریكردن بۆ ناردنی بار و پەیام. لە زۆربەی وڵات و شارە گەورەكانی جیهان ئەم سیستەمە بەکاردەهێنن بۆ زیادکردنی دروستکردنی نیشانەکان و گەشەپێدانی نوێ شارەكان و بەرزکردنی ئەندازەی دڵنیایی لە نیشاندانی شوێنەكانی.