بەرپرسێکی کورد لادەدرێت و تورکمانێک دەخرێتە شوێنی

بەڕێوەبەرە نوێیەکەی کشتوکاڵی کەرکووک دەستکاری پۆستەکان دەکات؛ بەرپرسێکی کورد لە ڕاگەیاندن لادرا و تورکمانێک خرایە شوێنی.
لە یەکەم هەنگاوی کارگێڕیدا دوای دەستبەکاربوونی، بەڕێوەبەری نوێی کشتوکاڵی کەرکووک دەستکاری پۆستە هەستیارەکانی ناو فەرمانگەکەی کرد و گۆڕانکاریی لە بەرپرسیارێتیی هۆبەی ڕاگەیاندنی فەرمانگەکەدا ئەنجام دا.
بەپێی فەرمانێکی کارگێڕی کە واژۆی "عصام سلمان  ادیس"، بەڕێوەبەری نوێی کشتوکاڵی کەرکووکی لەسەرە و ڕێککەوتی 21ـی کانوونی یەکەمی 2025ـی هەیە، بڕیار دراوە بە گواستنەوەی "ڕەغدە عەبدولواحید عەبدولحەمید" کە ئەندازیارێکی کشتوکاڵیی پێشکەوتووی کوردە، لە هۆبەی ڕاگەیاندنەوە بۆ بەشی ڕێنمایی و ڕاهێنانی کشتوکاڵی.
لە هەمان فەرماندا هاتووە، "عەبدوڵڵا حەسەن عەباس" کە ئەندازیارێکی تەکنیکیی تورکمانە، لە یەکەی ئەرشیفەوە گوازراوەتەوە بۆ هۆبەی ڕاگەیاندن و وەک "بەرپرسی هۆبەی ڕاگەیاندن" لە شوێنی بەرپرسە کوردەکە دەستبەکار بووە.
ئەم گۆڕانکارییە خێرایە لە کاتێکدایە کە تەنها چەند ڕۆژێکە "عصام سلمان" پۆستی بەڕێوەبەری گشتیی کشتوکاڵی کەرکووکی وەرگرتووە، ئەمەش وەک ئاماژەیەک بۆ دەستپێکردنی گۆڕانکاریی ڕیشەیی لە ناسنامەی ئیداریی فەرمانگەکەدا دەبینرێت.
هۆبەی ڕاگەیاندن لە فەرمانگەیەکی وەک کشتوکاڵ، ڕۆڵێکی گرنگی هەیە لە گواستنەوەی چالاکییەکان و بڕیارەکان بۆ ڕای گشتی. لادانی بەرپرسێکی کورد و دانانی کەسێکی تورکمان لەم شوێنەدا، وەک هەوڵێک بۆ کۆنترۆڵکردنی گوتاری ڕاگەیاندنی فەرمانگەکە و نیشاندانی هەژموونی پێکهاتەی تورکمان لە ناو ئیدارە نوێیەکەدا لێکدەدرێتەوە.
پێش دەستبەکاربوونی عصام سلمان، پۆستی بەڕێوەبەری کشتوکاڵ بۆ ماوەیەکی کەم لای کورد بوو. تورکمانەکان کە پۆستی پارێزگاریان لەدەست چوو، ئێستا لە ڕێگەی بەڕێوەبەرایەتییە گشتییەکانەوە (وەک کشتوکاڵ و تەندروستی) هەوڵی گۆڕینی هاوسەنگییەکە دەدەن و ئەو بەرپرسە کوردانە لادەبەن کە لە هۆبە و بەشەکاندا جێگیر بوون.
فەرمانگەی کشتوکاڵی کەرکووک یەکێکە لە پڕکێشەترین فەرمانگەکان، چونکە بڕیاردەرە لەسەر دۆسیەی زەوییە داگیرکراوەکان و گرێبەستە کشتوکاڵییەکان. هەر گۆڕانکارییەک لە بەرپرسی هۆبەکان (بەتایبەت ڕاگەیاندن، زەویوزار و یاسایی) کاریگەریی ڕاستەوخۆی دەبێت لەسەر چۆنیەتی مامەڵەکردن لەگەڵ کێشەی جوتیارانی کورد و تورکمان لە بەرانبەر عەرەبە هاوردەکان.
ئەم هەنگاوەی بەڕێوەبەرە نوێیەکە دەکرێت ببێتە هۆی دروستبوونی ناڕەزایەتی لە لایەن جوتیارانی کورد و لایەنە کوردییەکان، کە ترسیان هەیە ئەم گۆڕانکارییە ئیدارییانە ببێتە سەرەتایەک بۆ گەڕانەوەی بڕیارە نادادپەروەرانەکان دژ بە خاوەن زەوییە ڕەسەنەکان.