حکومەتی هەرێم داشکاندنێکی دیکە راگەیاندرا

داشکاندنی 20% بۆ خزمەتگوزارییەکی دیکە لە ڕێگەی "ئی-پسوولە" ڕاگەیەندرا
وەزارەتی شارەوانی و گەشتوگوزاری حکومەتی هەرێمی کوردستان ڕایگەیاند، بەشداریمان لە سەکۆی دیجیتاڵیی "ئی-پسوولە"دا کرد و، لەمەودوا شوێنە بازرگانییەکان دەتوانن پارەدانی کرێی خزمەتگوزارییەکانی شارەوانی، وەک کرێی کۆکردنەوەی خۆڵ و خاشاک، شایستەی تابلۆ، و ڕێکلامی تەلەفزیۆنی و لەیزەری بە شێوازی دیجیتاڵی ئەنجام بدەن.
لە ڕاگەیەندراوەکەدا هاتوو کە شوێنە بازرگانییەکان داشکاندنی 20% وەردەگرن بۆ هەر پارەدانێک کە لە ڕێگەی ئی-پسوولەوە ئەنجامی بدەن، ئەوەش بە مەبەستی گەڕاندنەوەی کات و دابینکردنی ئەزموونێکی سادە بۆ هاووڵاتییان و بازرگانان.
بەپێی ڕاگەیاندراوەکە: '' هاووڵاتییان دەتوانن لە ڕێگەی بانک و جزدانە ئۆنلاینەکانی وەکو AsiaPay، FastPay، FIB، NassWallet، ZainCash، Cihan Bank، NBI و RTB پارەدانەکان جێبەجێ بکەن.
لە کۆتاییدا ئاماژە بەوە کراوە کە پڕۆگرامی دارایی ئی-پسوولە لەلایەن مەسرور بارزانی، سەرۆکی حکومەتی هەرێمی کوردستانەوە لە مانگی شوباتی ڕابردوودا ڕاگەیاندرا، کە بەشێکە لە هەوڵەکانی کابینەی نۆیەم بۆ زیادکردنی گشتگیریی دارایی و گۆڕینی سیستەمی پارەدان بۆ شێوازی دیجیتاڵی.