شاندێکی پارتی سەردانی (دەوڵەتی یاسا، بەدر، نەهجی نیشتمانی و سۆمەرییون) کرد

شاندێکی پارتی دیموکراتی کوردستان بە سەرۆکایەتی دکتۆر فوئاد حسێن، ئەندامی مەکتەبی سیاسی پارتیمان، سەردانی هەریەک لە فراکسیۆنەکانی (دەوڵەتی یاسا، بەدر، نەهجی نیشتمانی و سۆمەرییون)یان لە ئەنجومەنی نوێنەرانی عێراق کرد،ئەمەش لە چوارچێوەی گفتوگۆ  بەردەوامەکانی نێوان هێزە سیاسییەکان.

لە دیدارەکاندا، باس لە پێشهاتە سیاسییەکان و مافە دەستوورییەکانی داهاتوو کرا. هەروەها جەخت لە گرنگیی هەماهەنگی و ڕاوێژی نێوان فراکسیۆنەکان کرایەوە، بە ئامانجی پشتیوانیکردن لە سەقامگیریی سیاسی، بەهێزکردنی کاری هاوبەش و خزمەتکردنی بەرژەوەندییە گشتییەکانی وڵات.

هاوکات لە كۆبوونەوەكاندا دووپاتی ئەوە كرایەوە  کە پێویستە گفتوگۆ و لێکتێگەیشتنی نێوان هێزە سیاسیەکان بەردەوام بێت، بۆ ئەوەی ڕێڕەوی دەستووری بپارێزرێت و ڕۆڵی دامەزراوەی یاسادانان لەم قۆناغە هەستیارەدا بەهێزتر بکرێت.