پەیامی ئەمریکا لەبارەی ڕۆژئاوا گەیشت

راگەیێندراوی هاوبەشی فەرەنسا، ئەڵمانیا، شانشینی یەکگرتوو (بەریتانیا) و ویلایەتە یەکگرتووەکانی ئەمریکا لەبارەی ڕۆژئاوای کوردستان

لە دەقی راگەیەندراوی هاوبەشی ئەم وڵاتانە هاتووە، ئێمە پێشوازی لە درێژکردنەوەی ئاگربەستی ١٥ ڕۆژەی نێوان هێزەکانی حکومەتی سووریا و هێزەکانی سووریای دیموکرات دەکەین کە لە ٢٤ی کانووندا ڕاگەیەندرا. داوا لە هەموو لایەنەکان دەکەین بە توندی پابەندی ئاگربەستەکە بن و دانبەخۆداگرتنی تەواو بنوێنن. داوا لە هەموو لایەنە دەرەکییەکان دەکەین بێنە ڕیزی ئێمە بۆ گەیشتن بە ئاشتی و کەمکردنەوەی توندوتیژی.

ئێمە پابەندبوونی هەموو لایەنەکان بە پاراستنی خەڵکی مەدەنی و ژێرخانی مەدەنی دووپات دەکەینەوە. پێشوازی لە نیشتەجێکردنی ڕێڕەوە مرۆییەکان دەکەین بۆ دەستەبەرکردنی گەیاندنی هاوکارییە مرۆییەکان بە سەلامەتی و بێ بەربەست. جەخت لەوە دەکەینەوە کە دەبێت ئەم ڕێڕەوانە بەردەوام بن و خزمەتگوزارییە سەرەتاییەکان لە شاری کۆبانی دەستپێبکەنەوە.

هەروەها پێشوازی لەو ڕۆڵە گرنگە دەکەین کە هاوبەشەکانمان دەیگێڕن، لەوانە عێراق، حکومەتی هەرێمی کوردستان، حکومەتی سووریا و هێزەکانی سووریای دیموکرات، لە ڕووبەڕووبوونەوەی ئەو تەحەدیانەی کە داعش دروستی کردوون.

داوا لە هەموو لایەنەکان دەکەین بە خێرایی لەسەر ئاگربەستێکی هەمیشەیی ڕێکبکەون، و لە زووترین کاتدا دەست بکەنەوە بە دانوستانەکان بە ئامانجی تێکەڵبوونی ئاشتیانە و بەردەوامی باکووری ڕۆژهەڵاتی سووریا لە چوارچێوەی دەوڵەتێکی یەکگرتوو و خاوەن سەروەری کە بە شێوەیەکی کاریگەر ڕێز لە مافی هەموو هاووڵاتیانی بگرێت و بییانپارێزێت، بە پشتبەستن بە ڕێککەوتنی ١٨ی کانوونی دووەمی ٢٠٢٦، وەک کاریگەرترین ڕێگا بۆ سەقامگیری لە سووریا.

ئێمە دووپاتی دەکەینەوە کە پێویستە هەوڵە بەکۆمەڵەکان بۆ شەڕی دژی داعش بەردەوام بن. داوا لە هەموو لایەنەکان دەکەین خۆیان لە هەر بۆشاییەکی ئەمنی لە ناوەوە و دەوروبەری سەنتەرەکانی دەستبەسەرکردنی داعش بپارێزن. بۆ چارەسەرکردنی ئەم نیگەرانییانە، ڕێککەوتین کە بە زوویی کۆبوونەوەیەکی هاوپەیمانی نێودەوڵەتی دژی داعش ئەنجام بدەین.

ئێمە پشتگیری خۆمان بۆ گواستنەوەیەکی سیاسی گشتگیر لە سووریا دووپات دەکەینەوە، کە مافی هەموو سوورییەکان بپارێزێت، و جەخت لەوە دەکەینەوە کە سەقامگیرکردنی باکووری ڕۆژهەڵاتی سووریا لە ڕێگەی ئاشتیانەوە ئەولەوییەتێکی سەرەکییە بۆ ڕێگریکردن لە سەرهەڵدانەوەی تیرۆر و بۆ ئاسایشی ناوچەکە. ئێمە ئامادەیی خۆمان نیشان دەدەین بۆ پشتگیریکردن و چاودێریکردنی جێبەجێکردنی ڕێککەوتنەکانی نێوان لایەنەکان لەگەڵ هاوبەشە هەرێمی و نێودەوڵەتییەکان، کە ئامانجیان تێکەڵبوونی ئاشتیانە و بەردەوامی باکووری ڕۆژهەڵاتی سووریایە لە ناو دەوڵەتێکی یەکگرتوو، گشتگیر و خاوەن سەروەری کە بە شێوەیەکی کاریگەر مافی هەموو هاووڵاتیانی بپارێزێت.