بەرپرسێکی باڵای ئەوروپا سەردانی هەولێر دەکات

ژان نوێل بارۆ، وەزیری دەرەوەی فەڕەنسا، ڕۆژی چوارشەممە گەشتێکی بۆ ڕۆژهەڵاتی ناوەڕاست دەستپێکرد کە سووریا، عێراق و لوبنان دەگرێتەوە، لەم چوارچێوەیەشدا چاوەڕوان دەکرێت کە سەردانی هەولێر بکات و لەگەڵ بەرپرسانی باڵا کۆ ببێتەوە بۆ گفتوگۆکردن لەسەر هەماهەنگی ئەمنی و پەیوەندییەکان لەگەڵ هەرێمی کوردستان.
پاسکال کۆنفارۆ، گوتەبێژی وەزارەتی دەرەوەی فەڕەنسا ڕایگەیاند، ئامانجی ئەم گەشتە بەهێزکردنی ڕۆڵی فەڕەنسایە لە ناوچەکەدا. ئاژانسی فرانس پرێس (AFP)یش بڵاویکردەوە کە بارۆ لە میانی سەردانەکەیدا بۆ عێراق، بڕیارە گەشت بکات بۆ هەولێری پایتەختی هەرێمی کوردستان و لەوێ لەگەڵ بەرپرسانی باڵای کورد کۆببێتەوە.
کۆنفارۆ ئاماژەی بەوەش کرد، ئامانجی سەرەکی بەشی عێراق لەم گەشتەدا، قووڵکردنەوەی هەماهەنگییە لەگەڵ دەسەڵاتە فیدراڵییەکانی بەغدا و بە تایبەتیش لەگەڵ هەرێمی کوردستان. چاوەڕوان دەکرێت گفتوگۆکانی هەولێر تیشک بخەنە سەر پشتگیریکردنی سەقامگیری ناوچەکە و دڵنیابوونەوە لە بەردەوامی هەوڵەکان دژی گرووپی دەوڵەتی ئیسلامی داعش.
هەروەها بڕیارە لە هەولێر و بەغدا باسی چارەنووسی ئەو چەکدارانەی داعش بکرێت کە ڕەگەزنامەی فەڕەنسییان هەیە و پێشتر لە سووریاوە گواستراونەتەوە بۆ گرتووخانەکانی عێراق و چاوەڕێی دادگاییکردن دەکەن.
یەکەم وێستگەی بارۆ شاری دیمەشقە و لەوێ لەگەڵ ئەسعەد شەیبانی، وەزیری دەرەوەی سووریا کۆدەبێتەوە. فەڕەنسا کە خۆی بە گەرەنتییەری مافەکانی کورد دەبینێت دوای ڕووخانی دەسەڵاتی بەشار ئەسەد، فشار دەکات بۆ جێبەجێکردنی تەواوی ڕێککەوتنەکەی نێوان هێزەکانی سووریای دیموکرات (هەسەدە) و حکومەتی دیمەشق.
پاریس جەختی لەسەر گرنگی ناساندنی دامەزراوە کوردییەکان لەناو پێکهاتە سیاسییە نوێیەکەی سووریادا کردووەتەوە، هەروەها دڵنیابوونەوە لەوەی کە کورد ڕۆڵێکی سەرەکی لە حوکمڕانی داهاتووی وڵاتەکەدا بگێڕێت.
بڕیارە ڕۆژی هەینی وەزیری دەرەوەی فەڕەنسا بگاتە بەیروت، لەوێش باسی پلانی حکومەتی لوبنان بۆ داماڵینی چەک لە حیزبوڵا و ئامادەکارییەکان بۆ کۆنفرانسی پاریس لە مانگی ئازاردا دەکات، کە ئامانجی پاڵپشتیکردنی سوپای لوبنانە.
ئەم گەشتە بە وێستگەکانی دیمەشق، بەغدا، بەیروت و هەولێر، پێگەیەکی دیار بە هەرێمی کوردستان دەبەخشێت لە چوارچێوەی هەوڵە فراوانەکانی فەڕەنسا بۆ گرێدانەوەی دیپلۆماسی، هەماهەنگی ئەمنی و پرسە سیاسییەکانی کورد لە سەرانسەری ناوچەکەدا.