زیاد کردنی نرخی کارتی ئینتەرنێت هەرێمی کوردستان ناگرێتەوە

وه‌زاره‌تی گه‌یاندنی عێراق بڕیاری سەپاندن و زیادکردنی باجی کارتی مۆبایل و ئینتەرنێت لە عێراق جێبەجێ  دەكات، بەڵام  بۆ کارتەکانی ئینتەرنێت هەرێمی کوردستان ناگرێتەوە.

بەپێی نووسراوێكی وەزارەتی پەیوەندییەكانی عێراق، كە رۆژی  23ی شوباتی 2026 دەرچووە، بڕیار دراوە: "بە سەپاندنی كرێی خزمەتگوزاری بەڕێژەی 20% بەسەر كارتەكانی مۆبایل و ئینتەرنێت جا فرۆشتنی لە ڕێگەی كارتەوە بێت یان ئەپڵیكەیشنەكانەوە بێت."

جەختیشی كردۆتەوە، وەرگرتنی ئەو 20% تەواوی كۆمپانیاكانی ئینتەرنێت (كێبڵ و وای فای) دەگرێتەوە و بڕیارەكەش لە 23ی شووباتەوە جێبەجێ دەكرێت.

دیلان ڕه‌شاد، به‌ڕێوه‌به‌ری ڕاگه‌یاندنی وه‌زاره‌تی گواستنه‌وه‌ و گه‌یاندنی حکوومەتی هەێمی کوردستان، ڕایگەیاند: "زیادکردنی باجی کارتی مۆبایل و ئینتەرنێت لە عێراق جێبەجێش بکرێت، بۆ کارتەکانی ئینتەرنێت هەێمی کوردستان ناگرێتەوە، چونکە کۆمپانیاکانی ئینتەرنێت لە لای ئێمە مۆڵەت و گرێبەستیان هەیە و پابەندی ڕێنماییەکانی ئێمەن."

ئەوەشی خسته ڕوو: کۆمپانیاکانی پەیوەندی و مۆبایل مۆڵەتیان لە لایەن حکوومەتی فیدڕاڵ پێدراوە، بۆیه پابەندی بڕیارەکانی ئەوان دەبن.

جەختی کردەوە، کۆمپانیا مۆڵەتپێدراوەکانی خزمەتگوزاریی ئینتەرنێت لە هەێمی کوردستان لەسەر نرخی پاکێجەکانی خۆیان بەردەوامن و هیچ زیادبوون و کەمبوونێک لەئارادا نییە.

لە ساڵی 2023 باجی سەر کارتی مۆبایل و ئینتەرنێت لە عێراق هەڵگیرا، بەڵام جارێکی دیکە حکوومەتی عێراق بڕیاری داوە بۆ زیادکردنی داهات بڕیارەکە جێبەجێ بكاتەوە.