پێشمەرگەیەک لە لایەن حەشدی شەعبییەوە بریندار کرا

لەكاتی گەڕانەوەی لە ئەركی خۆی لە گوندەكانی سنووری خانەقین بۆ سنووری قەزای كفری، پێشمەرگەیەک لە بازگەی (باوە مەحموود) لەگەڵ هێزەكانی حەشدی شەعبی تووشی دەمەقاڵێ دەبێت و لە دواوە دەستڕێژی گولـلەی لێ دەكەن و بە سەختی برینداری دەكەن. 
بەرەبەیانی ئەمڕۆ شەممە 14ـی 3ـی 2026، پێشمەرگەیەكی لیوای سێی پیادەی گەرمیان، لەدوای كۆتاییهاتنی ئەركەكەی و لەكاتی گەڕانەوەی بۆ ماڵەوە، لە بازگەی (باوە مەحموود) لەلایەن هێزەكانی حەشدی شەعبییەوە تەقەی لێ دەكرێت و بە سەختی بریندار دەكرێ. 
ئەو پێشمەرگەیە، ئەركی لە گوندەكانی سنووری خانەقینە و بەخۆشی خەڵكی یەکێک لە گوندەكانی سنووری كفرییە، بۆ هاتوچۆكردن ڕێگای بازگەی (باوە مەحموود)ـی بەكار هێناوە، لەكاتی گەڕانەوەشیدا، تووشی دەمەقاڵێ دەبێت و دوای ئەوەی لە بازگەكە دوور دەكەوێتەوە دەستڕێژی گولـلەی لێ دەكەن و بەو هۆیەوە سێ فیشەكی بەر خۆی و فیشەكێكیش بەر ئۆتۆمبێلەكەی دەكەوێت. 
هەر بەپێی زانیارییەكان، لە دوای ڕووداوەكەش، ئەو پێشمەرگەیە گەیەنراوەتە نەخۆشخانەی فریاكەوتنی كەلار و پاشان بەهۆی سەختیی برینەكەیەوە ڕەوانەی سلێمانی كراوە و ئێستا تەندروستی جێگیرە.