پارێزگاری هەولێر ڕای گەیاند، بە وردی چاودێری بازاڕەكان و نرخ دەكەن، بەهیچ شێوەیەك نابێت چاوپۆشی لە هیچ كەس و لایەنێك بكرێت سەرپێچی و زێدەڕۆیی بكاتە سەر موڵكی گشتی.
ئەمڕۆ یەكشەم 15ـی ئادار، بە سەرپەرشتی ئومێد خۆشناو پارێزگاری هەولێر، كۆبوونەوەیەكی تایبەت بۆ داڕشتنی پلانی پارێزگا بۆ جەژنی ڕەمەزانی پیرۆز و نەورۆز سەری ساڵی نوێی كوردی بەڕێوەچوو.
لە كۆبوونەوەكەدا پارێزگاری هەولێر، دەستخۆشی لە هێزە تەناهییەكان و فەرمانگە خزمەتگوزارییەكان كرد بۆ جێبەجێكردنی ئەركەكان، تیشكی خستەسەر دۆخی ناوچەكە بەگشتیی و ئامادەكاری و حاڵەتی ئامادەباشی داودەزگا خزمەتگوزارییەكان بۆ ڕووبەڕووبوونەوەی هەر پێشهات و ئەگەر و ڕووداوێك.
هەروەها دووپاتی لە ڕێنوێنییەكانی ژووری ئۆپراسیۆنی پارێزگای هەولێر لە هاوئاهەنگی نێوان یەكە كارگێڕییەكان و هێزە تەناهییەكان بۆ پاراستنی سەقامگیری و ئارامیی شار و دەوروبەری كردەوە، هەموو لایەنە پێوەندیدارەكانی ڕاسپارد بەوپەڕی توانایانەوە لە خزمەت هاووڵاتییاندابن، بۆ ئەوەی ڕۆژانی جەژنی ڕەمەزان و نەورۆز بە ئارامی بەڕێوە بچێت.
هەر لە كۆبوونەوەكەدا گفتوگۆ لەبارەی ڕەوشی بازاڕ و نرخ و جۆرەكانی خۆراك و پێداویستییەكانی هاووڵاتییان لە مانگی ڕەمەزانی پیرۆز بەشێوەیەكی گشتیی كرا، پارێزگاری هەولێر، بەبۆنەی هاتنی جەژنی ڕەمەزان و نەورۆز دووپات لە چاودێریكردنی چڕ و وردی بازاڕ و نرخ و كەلوپەل و پێداویستییەكانی هاووڵاتییان كردەوە و لیژنەكانیش ڕاسپێردران كە بە وردی چاودێری بازاڕ بكەن بۆ ئەوەی ڕێگری لە قۆرخكاری بكرێت، بەتایبەت لەم كاتانەدا كە قەیران یان گۆڕانكاریی سیاسی و تەناهی لە ناوچەكەدا ڕوو دەدات.
لەبارەی سەرپێچی و زێدەڕۆیی لەسەر موڵكی گشتی، پارێزگاری هەولێر هەموو پاڵپشتییەكی بۆ لایەنە پێوەندیدارەكان دووپات كردەوە و ئاماژەی بەوە دا كە بەهیچ شێوەیەك نابێت چاوپۆشی لە هیچ كەس و لایەنێك بكرێت سەرپێچی و زێدەڕۆیی بكاتە سەر موڵكی گشتی، لە ڕۆژانی جەژن و پشووەكانیش بەتایبەتی سەرجەم قایمقامیەت و شارەدێ و بنكەكانی ئاسایش و پۆلیسی بە هاوئاهەنگی شارەوانییەكانی ڕاسپارد، لە ئامادەباشیدا بن و ڕێگە نەدەن كەسانێك پشوو و بارودۆخەكە وەك دەرفەت بقۆزنەوە بۆ ئەنجامدانی سەرپێچی و زێدەڕۆیی.
وەڵام بدەوه