وەزارەتی پێشمەرگە هۆشداری دەدات

وەزارەتی پێشمەرگە هۆشداری دەداتە ئەفسەران و پێشمەرگە بۆ پاراستنی وێنە و ڤیدیۆکانیان
ئەمڕۆ هەینی 2ی ئابی 2026، وەزارەتی پێشمەرگە لە ڕاگەیەنراوێکدا هۆشداری دەداتە ئەفسەران و پێشمەرگە کە بە هیچ شێوەیەک وێنە و ڤیدیۆی کاتی ئەرک و ڕووبەڕووبوونەوەکان بۆ هیچ کەس و پەیجێک نەنێرن، ئەوەش لە پێناو پاراستنی زانیارییە کەسی و گشتییەکان.
لە ڕاگەیەنراوێکدا هاتووە، لەم ڕۆژانەدا بەشێک لە پەیج، ئەکاونت و کەسایەتییەکان لە تۆڕە کۆمەڵایەتییەکاندا، داوا لە ئەفسەران و پێشمەرگە دەکەن کە وێنە و ڤیدیۆی بەشداریکردنیان لە ئەرکەکاندا و بە جلوبەرگی سەربازییەوە بۆ بنێرن.
وەزارەتەکە دووپاتی دەکاتەوە کە بۆ پاراستنی زانیارییە کەسی و گشتییەکان، پێویستە ئەفسەر و پێشمەرگەکانی کوردستان لەم بابەتەدا زۆر وشیار بن و بە هیچ شێوەیەک وێنە و ڤیدیۆی تایبەت بە چالاکییە سەربازییەکانیان بۆ هیچ کەس و لایەنێک نەنێرن، بەتایبەت لە ناو تۆڕە کۆمەڵایەتییەکاندا.
لە کۆتایی ڕاگەیەنراوەکەدا داوا کراوە کە پێشمەرگە بەوپەڕی بەرپرسیاریەتی و وشیارییەوە مامەڵە لەگەڵ ئەم پرسەدا بکەن، بۆ ئەوەی خۆیان و یەکە سەربازییەکانیان بپارێزن.