کورتەی هەواڵ:
وەزارەتی ناوخۆی حکومەتی هەرێمی کوردستان نیگەرانیی خۆی بەرامبەر بەو لێکتێگەیشتنە تاکلایەنانەی حکومەتی فیدراڵ سەبارەت بە شنگال دەردەبڕێت کە بەبێ ڕاوێژکردن لەگەڵ هەرێم ئەنجام دراون. وەزارەتەکە جەخت دەکاتەوە کە شنگال بە خوێنی سەدان پێشمەرگە ئازاد کراوە و هەر هەنگاوێکی دەرەوەی ڕێککەوتننامەی تشرینی یەکەمی ٢٠٢٠، پرۆسەی ئاساییکردنەوە لەباردەبات، بۆیە داوا دەکات تەواوی ڕێککەوتنەکە جێبەجێ بکرێت یان گەڕانەوە بۆ ئیرادەی خەڵکی ناوچەکە بکرێتە بنەما.
دەقی هەواڵ:
وەزارەتی ناوخۆی حکومەتی هەرێمی کوردستان بە نیگەرانییەوە چاودێریی ئەو لێکتێگەیشتنانە دەکات کە حکومەتی فیدراڵ سەبارەت بە دۆخی شنگال، بە شێوەیەکی تاکلایەنە و بەبێ ڕاوێژ لەگەڵ حکومەتی هەرێمی کوردستان ئەنجامیان دەدات. لەم چوارچێوەیەدا، جەخت کراوەتەوە کە هەر هەنگاوێکی لەم شێوەیە، پێچەوانەی ڕێککەوتننامەی شنگالە کە لە تشرینی یەکەمی ٢٠٢٠دا بە سەرپەرشتیی نەتەوە یەکگرتووەکان واژۆ کراوە.
حکومەتی هەرێم بیرستی هێنەوە کە شنگال و چیای شنگال بە خوێنی ئاڵی ٥٠٠ شەهید و ٣٠٠٠ برینداری پێشمەرگە قارەمانەکان ئازاد کراوە و دەبێ ڕێز لەو قوربانی و تێکۆشانە بگیرێت. هەروەها سەپاندنی واقیعێکی ئەمنی و کارگێڕیی نەخوازراو لە دەرەوەی دامەزراوە شەرعییەکان، دۆخی دەڤەرەکە ئاڵۆزتر دەکات و پرۆسەی ئاساییکردنەوە لەباردەبات.
وەزارەتی ناوخۆ ڕایگەیاند کە تاکە ڕێگەچارەی دروست، جێبەجێکردنی تەواوی ڕێککەوتننامەی شنگالە؛ چونکە تاکە زامنی پێکهێنانی ئیدارەیەکی شەرعی لەلایەن نوێنەرانی ڕاستەقینەی ناوچەکەوە، دەستپێکردنەوەی ئاوەدانکردنەوە، و سەقامگیرکردنی ئاسایشە، کە ئەمانەش مەرجی سەرەکین بۆ گەڕانەوەی ئارەزوومەندانە و شکۆمەندانەی سەدان هەزار خوشک و برای ئێزدی بۆ سەر زێدی خۆیان.
لە کۆتایی ڕاگەیەندراوەکەدا، داوا لە حکومەتی فیدراڵ کراوە کە پابەندی ڕێککەوتننامەی شنگال و سەرجەم ئەو ڕێککەوتنە سیاسی و بەرنامەی حکوومەتانە بێت کە لە بوارەکانی ئیداری، ئەمنی و ئاوەدانکردنەوەدا ئەنجامی داون. هەروەها ئاماژە بەوە دراوە کە ئەگەر جێبەجێکردنی ئەم ڕێککەوتنانە ئەستەمە، با بگەڕێنەوە بۆ ڕا و ئیرادەی خەڵکی شنگال بەتایبەتی ئێزدییەکان، چونکە سەقامگیریی دەڤەرەکە و ئارامیی خەڵکەکەی لە سەرووی هەموو بەرژەوەندی و ئامانجێکی ترەوەیە.
#Kurdistanpress
وەڵام بدەوه