شرۆڤەکار و پەرلەمانتارێکی پێشووی کورد لە پەرلەمانی عێراق پێی وایە، کورد بە نیەتی پاکەوە چووەتە نێو حکوومەتی ئێستای عێراق و لێکتێگەیشتنی ئەم جارە بە دەرفەت دەزانێت بۆ چارەسەرکردنی کێشەکان و دەشڵێ، لەو ڕۆژەی ئەم حکوومەتە دەست بە دژایەتیی کورد بکات، ئەوە شکستی خۆی تۆمار دەکات.
موئەد تەیب، شرۆڤەکار و پەرلەمانتاری پێشووی پارتی، بە ماڵپەڕی فەرمیی پارتی دیموکراتی کوردستانی ڕاگەیاند: "ھەر دوای دەرچوونی دەستووری عێراق کورد شتێکی داوا نەکردووە پێچەوانەی دەستوور و یاسا بێت، کورد ھەموو کات بە نیەتێکی پاکەوە چووەتە نێو پرۆسەی سیاسی و پێکھێنانی حکوومەتە یەک لەدوا یەکەکانی عێراق، چەندین ڕێککەوتن کراون و ھەمووی عێراق لێی پاشگەز بووەتەوە، ڕێککەوتنی ھەولێر بە پێشنیاری سەرۆک بارزانی کرا، ئەوە بەغدا بوو لێی پاشگەز بووە و جێبەجێی نەکرد، کێشەی ھەرێم لەگەڵ بەغدا لەوەدایە ھەموو جارێک کە ئەوان بەڵێن دەدەن دوای پێکھێنانی حکوومەت بەڵێنەکانی خۆیان لەبیر دەچێتەوە.''
ئەو پەرلەمانتارەی پێشووی پارتی گوتی: "ئێستا عێراق لەوە گەیشتووە کە بەبێ ھەرێمی کوردستان سەقامگیری بە خۆیەوە نابینێت، ئەم جارەش ئەگەر بەغدا نیەتی پاکە بۆ چارەسەرکردنی کێشەکان ئەوە ھەرێم نیەتی پاکە و ڕێککەوتن و لێکتێگەیشتنی ئەم جارە دەرفەتە بۆ چارەسەرکردنی کێشەکان، پێویستە ھەردوولا ئەزموون لە ساڵانی ڕابردوو وەربگرن، ڕێککەوتنی ھەرێم و بەغدا لە بەرژەوەندیی بەغدا و ھەرێمی کوردستانیشە.''
موئەیەت تەیب ئاماژەی بۆ ئەوە کرد: "ھەردوولا پابەندی دەستوور بن کێشەکان چارەسەر دەبن، ھیچ سەرکردەیەکی کورد نەیگوتووە ئێمە پابەندی دەستوور نابین، ھەتا کورد توانیی دەستووری عێراق لە کەوتن ڕزگار بکات، ڕێککەوتن لە نێوان دوولایەنە و پێویستە ھەردوولا پابەند بن بۆ جێبەجێکردنی.''
موئەیەد تەیب دەشڵێت: ''محەمەد شیاع سوودانی، سەرۆکوەزیرانی عێراق ھەوڵ دەدات بە ھەر شێوەیەک بێت ھەرێمی کوردستان ڕازی بکات، چوارچێوەی ھەماھەنگییش باش دەزانێت ئێستا سەدر لە دەرەوەی حکوومەتە و ئۆپۆزسیۆنێکی بەھێزە ئەگەر بێت و کوردیش ناڕازی بێت تەمەنی حکوومەتی ئێستای عێراق زۆر نابێت، لەو ڕۆژەوەی حکوومەتی عێراق دەست بە دژایەتیی ھەرێمی کوردستان بکات، ئەوە دەست بە شکستی خۆی دەکات.
وەڵام بدەوه