قایمقامی ماوەت: ژمارەی گیانلەدەستدان بەهۆی بۆردوومانی چیای ئاسۆسەوە بووە دوو کەس

قایمقامی قەزای ماوەت لە پارێزگای سلێمانی دەڵێت، نزیک گوندی گەڵاڵە و سەفرە لە چیای ئاسۆس بۆردوومانکرا و بەهۆیەوە دوو کەس گیانیان لەدەستدا و سێ کەسیش برینداربوون.
 
رۆژی هەینی، 2-12-2022، کامەران حەسەن، قایمقامی قەزای ماوەت لە پارێزگای سلێمانی وتی: "دوای نیوەڕۆی ئەمڕۆ هەینی، بۆردوومانی ناوچەیەک لە نزیک گوندی گەڵاڵە لە چیای ئاسۆس کرا و لەو کاتەشدا ژمارەیەک کەس لەوێ بوون. هێشتا دیارنییە بۆردوومانەکە لەلایەن فڕۆکەی جەنگییەوە بووە یان درۆن." گوتیشی، بەهۆی ئەو بۆردوومانەوە دوو کەس گیانیان لەدەستدا.
 
کامەران حەسەن گوتیشی: "ئەو کەسانەی بەر بۆردوومانەکە کەوتوون خەڵکی گوندی قامیشن و دیار نییە بۆچی چوونەتە ئەو ناوچەیە، بەڵام خەڵکی سڤیلن."
 
بەگوتەی قایمقامی ماوەت، لە بۆردوومانەکەدا کەسێک بێسەروشوێنە و تاوەکو ئێستا نازانرێت لە ژیاندا ماوە یان گیانی لەدەستداوە. دەشڵێت، تیمە تەندروستییەکان و فریاکەوتن رەوانەی ئەو شوێنە کراون، بەڵام بەهۆی سەختیی شوێنەکەوە نەتوانراوە ئۆتۆمبێل بنێردرێتە شوێنەکە.
 
قایمقامی قەزای ماوەت ئاماژەی بەوەش کرد: "هێشتا دیار نییە ئەو بۆردوومانەی کراوە لەلایەن کام هێز و وڵاتەوە بووە، بەڵام پێشتر چەند جارێک تورکیا بۆردوومانی ناوچەکەی کردووە." 
 
ئەمساڵ چەند جارێک ناوچەکانی ماوەت و شارباژێر بۆردوومانکراون؛ دوایینیان رۆژی دووشەممە 26-9-2022 بوو کە ئەو رۆژە کامەران حەسەن، قایمقامی ماوەت بە رووداوی گوت، "فڕۆکەکانی تورکیا گوندی گەڵاڵەی سنوورەکەیان بۆردوومانکرد."