سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات

ئەمڕۆ چوارشەممە 14ی دیسێمبەر، مەسرور بارزانی سەرۆکی حکومەتی هەرێمی کوردستان، پێشوازی لە مارک برایسن ریچاردسن باڵیۆزی بەریتانیا لە عێراق کرد .
لە کۆبوونەوەکەدا دوایین گۆڕانکاری و پەرەسەندنەکانی عێراق و ناوچەکە و پەرەپێدانی پەیوەندییەکانی ھەرێمی کوردستان و بەریتانیا تاووتوێ کرا .
هەردوولا جەختیان لە گرنگیی چارەسەرکردنی کێشە هەڵپەسێردراوەکانی نێوان هەرێمی کوردستان و حکومەتی فیدراڵی لە سەر بنەمای دەستوور و کارنامەی وزاریی حکومەت کردەوە.
سەرۆکی حکومەت ئاماژەی بەوە دا کە کەشێکی ئەرێنی لە ئارادایە بۆ چارەسەرکردنی کێشەکان و ھیوادارین ڕەزامەندیدان لە سەر ناردنی پشکی ھەرێم بۆ مانگەکانی 11 و 12 ، ببێتە ھەنگاوێک بەرەو گەیشتن بە ڕێککەوتن لەسەر چارەسەرکردنی کێشەکانی پەیوەندیدار بە بودجە و نەوت وگاز و ناوچە کێشە لەسەرەکان و پرسەکانی تر.
لە تەوەرێکی دیکەی کۆبوونەوەکەدا ، گفتوگۆ دەربارەی چاکسازییەکانی کابینەی نۆیەم بەتایبەتی بەدیجیتەڵکردنی خزمەتگوزارییە گشتییەکان و ھەناردەکردنی بەروبوومی کشتوکاڵی ھەرێمی کوردستان بۆ بازاڕەکانی بەریتانیا و ئەوروپا بەگشتی کرا.
گرنگیی پاراستنی ئاسایش و سەقامگیریی ھەرێمی کوردستان و جێبەجێکردنی ڕێککەوتننامەی شنگال و ئاساییکردنەوی دۆخی ناوچەکە و دەرچوونی میلشیا و ھێزە چەکدارە نایاساییەکان ، بەشێکی دیکەی گفتوگۆکان بوو .