هاوكات لەگەڵ بەڕێوەچوونی دووەم گەڕی دانوستانەكانی ئێران و ئەمەریكا و قسەی بەرپرسانی ئێران بەوەی ئامادەن بۆ رێككەوتن، ماڵپەڕێكی ئەمەریكی ئاشكرای كرد كە ئیدارەی دۆناڵد ترەمپ سەرۆكی ئەمەریكا خۆی بۆ شەڕێكی گەورە لە دژی ئێران بە بەشداریی ئیسرائیل و لە ماوەیەكی زۆر نزیك ئامادە دەكات.
ماڵپەڕی "ئاكسیۆس"ی ئەمەریكی ئاماژە دەكات كە هەر جموجۆڵێكی سەربازیی ئەمەریكا لە دژی ئێران، هەڵمەتێكی گەورەی سەربازی بۆ چەند هەفتەیەك دەبێت، نزیك دەبێت لە شەڕێكی سەرانسەری نەك هێرشێكی كورت و ورد وەك ئەوەی لە ڤەنزوێلا لە مانگی رابردوو ئەنجامی دا و بووە هۆی گرتنی نیكۆلاس مادۆرۆی سەرۆكی ئەو وڵاتە.
راپۆرتەكە باسی ئەوە دەكات كە شەڕەكە بریتی دەبێت لە هەڵمەتێكی فرەوانی سەربازی هاوبەشی ئەمەریكا و ئیسرائیل، كاریگەرییەكەی لە شەڕەكەی هاوینی رابردوو بۆ سەر رژێمی ئێران زیاتر دەبێت، هەڵمەتەكە كاریگەرییەكی گەورەشی لەسەر تەواوی ناوچەكە دەبێت، بەتایبەتی لێكەوتەی مەترسیداری بۆ سەر سێ ساڵی داهاتووی سەرۆكایەتیی ترەمپ دەبێت.
وەك ماڵپەڕەكە پێشبینی دەكات كە گەیشتن بە رێككەوتن لەئارادا نییە، بەتایبەتی كە ئێران دەیەوێ دانوستانەكان تەنیا بەرنامەی ئەتۆمیی تاران بگرێتەوە و ئەمەریكا و ئیسرائیلیش دەیانەوێ بەرنامەی مووشەكی و میلیشیاكانی لە ناوچەكە بگرێتەوە، لەوكاتەی لیندسی گراهام سیناتۆری ئەمەریكی پێی وایە هەر هێرشێك بۆ سەر ئێران چەند هەفتەیەك دەخایەنێت، راوێژكارێكی ترەمپ بە ماڵپەڕەكەی گوت كە سەرۆك ترەمپ هەست دڵتەنگی دەكات، چونكە هەندێك لە بازنە نزیكەكەی وریایی لەبارەی شەڕ لەگەڵ ئێران پێ دەدەن، بەڵام پێی وایە ئەگەری 90% هەیە بۆ هێرشێكی سەربازیی ئەمەریكی لە چەند هەفتەی داهاتوو.
وەڵام بدەوه