ئەمڕۆ هەینی 20ی کانوونی دووەمی 2023، مەسرور بارزانی، سەرۆکی حکومەتی هەرێمی کوردستان پەیوەندییەکی تەلەفۆنیی لە ئامۆس هۆکستین هاوئاهەنگکاریی تایبەتی سه‌رۆكايه‌تیی ئه‌مريكا بۆ ژێرخانى جيهانى و ئاسايشی وزه پێگەیشت.
لە پەیوەندییەکەدا، سەرۆکی حکومەت باسی لە دواسەردانی خۆی کرد بۆ بەغدا لە ڕۆژی 1/11 و کۆبوونەوەی لەگەڵ سەرۆکوەزیرانی فیدراڵ و ئامادەیی حکومەتی هەرێمی کوردستانی بۆ چارەسەرکردنی کێشەکان لەسەر بنەمای دەستوور دووپات کردەوە. بە تایبەتی هەوڵەکانی ئامادەکردنی یاسای نەوت و گازی فیدراڵ بەپێی دەستووری عێراق.
لەمبارەیەوە سەرۆکی حکومەت، جەختی لەوە کردەوە، تا ئەو کاتەی یاسای نەوت و گازی فیدراڵ دەردەچێت، حکومەتی هەرێم هاوئاهەنگیی لەگەڵ بەغدا دەکات بۆ بەردەوامبوون لە بەرهەمهێنان و پەرەپێدانی کەرتی وزەی خۆی.
هاوئاهەنگکاریی تایبەتی سه‌رۆكايه‌تیی ئه‌مريكا، کورتەیەکی دەربارەی سەردانی ئەم چەند ڕۆژەی دواییان بۆ بەغدا و هەولێر خستەڕوو. هەردوولا هاوڕا بوون لەسەر گرنگیی نەهێشتنی ئاستەنگەکان لەبەردەم پەرەپێدان و پێشخستنی کەرتی وزەدا.
لە تەوەرێکی دیکەی پەیوەندییەکەدا، پەرەپێدانی پەیوەندییەکانی ئەمریکا و هەرێمی کوردستان تاوتوێ کرا. هەردووکیان هاوڕا بوون لەسەر گرنگیی برەودان بە بوارەکانی بازرگانی و وەبەرهێنان و وزە لە هەرێمی کوردستان و عێراق.
وەڵام بدەوه