وەزارەتی ناوخۆ هەنگاوی نوێ دەگرێتە بەر

وەزارەتی ناوخۆ بەمەبەستی کۆنترۆڵکردنی چەکی بێ مۆڵەت و دیاردەی چەکداری، هەنگاوی نوێ دەگرێتەبەر
بە واژووی بەڕێز ڕێبەر ئەحمەد وەزیری ناوخۆ، وەزارەتی ناوخۆی حکومەتی هەرێمی کوردستان بە نوسراوی ژمارە ١٠٣٣٨ لە ٢٥/٤/٢٠٢٣، بەمەبەستی کۆنترۆڵکردنی چەک و دیاردەی چەکداری، لە ڕێی چەند خاڵێکەوە داوای هاوکاری و هەماهەنگی لە پارت و هێزە سیاسییە مۆڵەتدراوەکانی کوردستان دەکات. وەزیر ناوخۆ لەو نوسراوەدا داوای لە هێز و لایەنە سیاسییەکان کردووە کە میدیاکانیان بۆ هەڵمەتی هۆشیاری ئەندامانیان و هاووڵاتیان بخەنە گەڕ تا چەک لە ماڵەکان نەبێت و کەس چەکی بێ مۆڵەت هەڵنەگرێت. هەروەها داوا کراوە کە هیچ حزبێک لە هیچ بۆنەیەکدا چەک وەکو دیاری نەبەخشێتە ئەندام و لایەنگرانی خۆی و داواش کراوە کە لە بارەگانیان کۆگا دروست بکەن تا پاسەوانی بارەگاکانیان لە دوای دەوام چەک نەبەنەوە ماڵەوە. بەڕێز وەزیری ناوخۆ ئاماژەی بەوە کردووە کە بەجێبەجێکردنی ئەم هەنگاوانە، زەمینەیەکی باشتر بۆ کۆمەڵگەی کوردستان بۆ کۆنترۆڵکردنی چەک و کەمکردنەوەی دیاردەی چەکداری دروست دەبێت، کە دواجار ئەمە دەبێتە هۆی کەمبوونەوەی دەرفەتی تاوان و توندوتیژی، ئەمەش بە قازانجی پاراستنی گیانی هاووڵاتیانمان تەواو دەبێت.
بۆ بینینی نوسراوە و یاسای چەک ژمارە ٢ی ساڵی ٢٠٢٢ و ڕێنماییەکانی ژمارە ٥ و ٦ی ساڵی ٢٠٢٢، سەردانی ئەم لینکە بکەن:
To Political Parties - Google Drive
راگەیاندنی وەزارەتی ناوخۆی حکومەتی هەرێمی کوردستان 
٢٥/٤/٢٠٢٣