هەر حزب و بزووتنەوەیەکی سیاسی مافی خۆیەتی چ جۆرە ئایدیۆلۆیاو هزرو رێبازێکی سیاسی و مێتۆدێک لە رووبەری کاری سیاسیدا هەڵدەبژێڕێ و چ جۆرە ئایدیایەک پەیرەو دەکات.
هەر پارتێکی سیاسی بەر لەوەی دەست بکات بە کاری سیاسی، مافی خۆیەتی کێ و چ بکەرێکی سیاسی و کۆمەڵایەتی دەکات بە سەرۆک و سەرداریەوە.
هەر بزووتنەوەیەکی سیاسی بەرلەوەی هەنگاو بەرەو هاتنە ناوەوەی کۆڕی خەباتی سیاسی بنێت، مافی خۆیەتی هەڵگری چ جۆرە رۆشنبیری و دونیابینی و عەقڵ و روانینێکە.
بەڵام…
هەموو ئەم مافانە بەندن بە تێگەیشتن لە کۆمەڵێک پرەنسیپ و مەبدەئی ئەخلاقی و یاساییەوە. پەیوەستن بەو پرەنسیپانەی کارو خەباتی سیاسی گەرەکە پابەندی ئەو مەبادیئە ئەخلاقیانە بێت یاساورێسا و عورفە کۆمەڵایەتی و نیشتیمانیەکانی لەسەر دامەزراون و لادان لێیانەوە دەچێتە خانەی خیانەتی نیشتیمانی و لەناوبردنی هەستی ئینتیمای نەتەوەیی و نیشتیمانی تاکەکانی کۆمەڵگاوە.
بەداخەوە سەرلەبەری چالاکی و جموجۆڵی حزب و بزووتنەوە سیاسیە کرچ و کاڵەکانی رووبەری کاری سیاسی لە هەرێمی کوردستان بە سوود وەرگرتن لە کەشی ئازادی و دیموکراسی و ئازادی راگەیاندن و ئاخاوتنەوە، بۆتە هۆکاری بەرهەم هێنانی جۆرێکی گەورە لە داڕمان و دڕدۆنگی هەستی نیشتیمان پەروەری لای بەشێکی بەرچاوی کۆمەڵگاوە.
بەداخەوە پروپاگندە بەردەوامە بە تەوژمەکانی ئەم حزبە بچوکانە لە پانتای بەرفراوانی راگەیاندندا، کۆمەڵێک دەرەنجامی زۆر خراپ و جێی مەترسی و زیانبەخشی کۆمەڵایەتی و نەتەوەیی بۆ دوارۆژی هەرێمی کوردستان لێکەوتۆتەوە.
بەوەی لای بەشێک لەم حزبانە کارکردن لەسەر نەهێشتنی ئینتیمای تاکی کورد بۆ خاک و نەتەوەو ئاڵاو رەمزە نیشتیمانی و نەتەوەییەکان، بۆتە رێبازو ئەولەویەتی جموجۆڵ و پرەپاگندەکانیانەوە.
دەرەنجامە زیانبەخشەکانی هەڵنەگرتنی بەرپرسیارەتی نەتەوەیی و نیشتیمانی و ئەخلاقی لای پارت و بزاڤە سیاسیە پۆپۆلیستیەکانی رووبەری کاری سیاسی لەهەرێمی کوردستاندا، رێک خزمەتە بە ئەجیندای نەیارانی کورد و پلانێکی ترسناکە بە ئاراستەی سرینەوەی هەستی کورد بوون و پشت کردنە رەمزو هێما نەتەوەیی و کوردستانیەکانەوە.
بۆیە ئەم دۆخە نامتمانەییەی حزب و گرووپە سیاسیە بچووکەکان ناویانەتەوە، دەبێ ببێ بە شوێن هەڵوەستە لەسەرکردنی کاربەدەستانی سیاسی هەرێمەوەو گەرەکە سنوورێکی بۆ دابنرێ و لە شوێنێک بوەستێنرێت و چیتر تەشەنە نەکات.
وەڵام بدەوه