لە چوارشەمی رابردووەوە ژمارەیەك گرووپی چەكدارلە باكوری رۆژئاوای سووریا دەستیان بە هێرشێكی فرەوان بۆ سەر ناوچەكانی ژێر دەسەڵاتی حكوومەتی سووریا كردووە، توانیویانە ناوچەیەكی فرەوان لە هەردوو پارێزگای ئیدلب و حەلەب كۆنترۆڵ بكەن، ئەوەش بووە مایەی ترسێكی گەورەی عێراق، ئەمڕۆ ئەو گرووپانە لە بەیاننامەیەكدا حكوومەتی عێراقیان دڵنیا كردەوە كە نابنە سەرچاوەی نیگەرانی و هەڕەشە بۆ ناوچەكە.
بەپێی بەیاننامەی ئەو گرووپانە كە لە ژێر ناوی، لە حكوومەتی رزگاركردنی سووریاوە بۆ حكوومەتی عێراق رەوانە كراوە و تیایدا هاتووە، كارگێڕیی كاروباری سیاسی لە حكوومەتی رزگاركەری سووریا دووپات لە لە پێوەندیی برایانە و دۆستانەی پتەوی نێوان هەردوو گەلی سووری و عێراقی دەكاتەوە، ئەو پێوەندییەی بە درێژایی مێژوو هەیە و بە بەردەوام برایەتی و چارەنووسی هاوبەش كۆی كردووینەتەوە، ئێمە لە سووریای ئازاد بەتەواوی باوەڕمان بەوە هەیە كە بەرژەوەندیی هاوبەشمان پێویست بە هاریكاری و لێكگەیشتنی بەردەوام لە نێوان هەردوو وڵات دەكات.
زیاتر هاتووە، شۆڕشی سووریا كە لەپێناو ئازادی و سەربەرزی دەستی پێ كرد، شۆڕشێكە هەوڵی رزگاركردنی گەلی سووریا لە ستەمی رژێمی تاوانباری ئەسەد دەدات، هاوكات هیچ هەڕەشەیەك بۆ سەر ئاسایش و سەقامگیری لە عێراق یان لە هەر دەوڵەتێكی تری ناوچەكە دروست ناكات، ئێمە لە حكوومەتی رزگاركردن، حكوومەت و گەلی عێراق دڵنیا دەكەینەوە بەوەی سووریا نابێتە سەرچاوەی نیگەرانی یان پشێوی لە ناوچەكە، بە پێچەوانەی ئەوە بە پەرەپێدان و پتەوكردنی پێوەندیی هاریكاری لەگەڵ عێراق پابەندین، بۆ مسۆگەربوونی سەقامگیری لە ناوچەكە و گەیشتن بەوەی لە بەرژەوەندیی هاوبەشی گەلەكانماندایە
وەڵام بدەوه