فەرماندەی هێزەكانی هەسەدە لە كۆنگرەیەكی رۆژنامەوانیدا لەبارەی دۆخی سووریاوە رای گەیاند كە بە هاوكاریی ئەمەریكا ئاوارەكانی شەهبامان رزگار كرد و ئاشكرایشی كرد كە بڕیاریان نەداوە لە دژی چەكدارانی تەحریر شام شەڕ بكەن.
ئەمڕۆ هەینی، شەشی كانوونی یەكەمی 2024، مەزڵووم عەبدی فەرماندەی هێزەكانی هەسەدە لە كۆنگرەیەكی رۆژنامەوانیدا رای گەیاند كە هێشتا بڕیاریان نەداوە لە دژی چەكدارانی تەریر شام شەڕ بكەن و ئاماژەیشی كرد كە مەترسیی لەسەر كەمپی هۆڵ هەیە، بەهۆی ئەوەی داعش لە نزیك كەمپەكە دەستی بە هێرش كردووە.
لەبارەی مەترسیی لەسەر كوردەكانی رۆژئاوایشەوە، عەبدی ئاماژەی بەوە دا كە 250 هەزار كورد لە حەلەبی سووریا لەژێر مەترسیدان و لەبارەی كێشەكانیشیانەوە گوتی كە دەیانەوێت كێشەكانیان لەگەڵ توركیا بە دیالۆگ چارەسەر بكەن.
مەزڵووم عەبدی ئەوەیشی بە رۆژنامەوانان گوت كە پارێزگاری لە دانیشتوانی گەڕەكەكانی ئەشرەفییە و شێخ مەقسوود دەكەن لە سووریا و لەبارەی پێوەندیشیانەوە ئاشكرای كرد كە پێوەندییان لەگەڵ دەستەی تەحریری شامدا هەیە و هاوكات هاوئاهەنگیشمان لەگەڵ رووسیا و عێراقدا هەیە بۆ چارەسەركردنی پرسی سووریا و ئامادەیی خۆشیانی نیشاندا بۆ بەشداریی كردن لە دیالۆگی چارەسەری پرسی سووریا.
وەڵام بدەوه